پنجاب کے تعلیمی بورڈز نے انٹرمیڈیٹ پارٹ ون کے نتائج کا اعلان کردیا

بدھ 15 اکتوبر 2025 16:30

لاہور (اُردو پوائنٹ اخبارتازہ ترین - این این آئی۔ 15 اکتوبر2025ء) پنجاب بھر کے تعلیمی بورڈز نے انٹرمیڈیٹ پارٹ ون کے نتائج کا اعلان کر دیا۔پنجاب بھر کے تمام بورڈز آف انٹرمیڈیٹ اینڈ سیکنڈری ایجوکیشن نے فرسٹ ایئر (گیارہویں جماعت)کے سال 2025ء کے سالانہ امتحانات کے نتائج جاری کر دیئے ہیں۔لاہور بورڈ کے جاری نتائج کے مطابق کامیابی کا تناسب 53اعشاریہ 77فیصد رہا، 92ہزار 541طلباء نے کامیابی حاصل کی، امتحانات میں ایک لاکھ 72ہزار 100امیدواروں نے شرکت کی۔

کنٹرولر امتحانات کے مطابق پری میڈیکل گروپ میں کامیابی کا تناسب 64.30فیصد، پری انجینئرنگ گروپ میں کامیابی کا تناسب 73.36فیصد اور جنرل سائنس گروپ میں کامیابی کا تناسب 57.99فیصد، کامرس گروپ میں کامیابی کا تناسب 50.11فیصد جبکہ آرٹس گروپ میں کامیابی کا تناسب 40.05 فیصد رہا۔

(جاری ہے)

سرگودھا کے تعلیمی بورڈ نے بھی انٹر میڈیٹ پارٹ ون کے نتائج کا اعلان کر دیا، سال 2025ء کے امتحانات میں کل 54831امیدوار شریک ہوئے، 31278امیدوار کامیاب قرار پائے، کامیابی کا تناسب 57.04فیصد رہا۔

فیصل آباد تعلیمی بورڈ کی جانب سے انٹرمیڈیٹ نتائج پارٹ ون کے نتائج کا اعلان کر دیا گیا، امتحانات میں 44فیصد امیدوار فیل ہوگئے۔سیکرٹری ایجوکیشن کے مطابق انٹرمیڈیٹ پارٹ ون میں کامیابی کا تناسب 55.74فیصد رہا، امتحان میں کل 108182طلبا و طابات نے شرکت کی، 60ہزار 302طلبہ کامیاب ہوئے۔بہاولپور بورڈ نے بھی انٹرمیڈیٹ پارٹ ون (گیارہویں)جماعت کے نتائج کا اعلان کر دیا۔

کنٹرولر امتحانات کے مطابق انٹرمیڈیٹ پارٹ ون کے امتحانات میں کل 57720امیدواران نے شرکت کی، 9981امیدواران کامیاب قرار پائے، نتائج کا مجموعی تناسب 53.17 رہا۔گوجرانوالہ تعلیمی بورڈ نے انٹر پارٹ ون کے سالانہ امتحانات 2025ء کے نتائج کا اعلان کر دیا۔چیئرمین بورڈ کے مطابق امتحان میں مجموعی طور پر ایک لاکھ 42 ہزار 101 امیدواروں نے شرکت کی، امتحان میں 71ہزار 9امیدوار پاس ہوئے، امتحانات میں کامیابی کا تناسب 49.97 فیصد رہا۔