ایشوریا سے پہلی ملاقات میں ان کی آنکھیں دیکھ کر دم بخود رہ گیا تھا، سنجے لیلا بھنسالی

ایشوریا کی آنکھیںنارمل نہیں یہ اس قدر طاقتور ہیں اگر آپ انھیں ڈائیلاگ نہ بھی دیں تو ان کی آنکھیں خود اسکا اظہار کریں گی، بالی ووڈ ڈائریکٹر

ہفتہ 19 جون 2021 14:05

ایشوریا سے پہلی ملاقات میں ان کی آنکھیں دیکھ کر دم بخود رہ گیا تھا، ..

ممبئی (اُردو پوائنٹ اخبارتازہ ترین - این این آئی۔ 19 جون2021ء) بالی ووڈ کے فلم ڈائریکٹر، پروڈیوسر، اسکرین رائٹر اور میوزک ڈائریکٹر سنجے لیلا بھنسالی نے ایک دفعہ اپنی فلم ’ہم دل دے چکے صنم‘ کی اداکارہ ایشوریا رائے بچن سے اپنی پہلی ملاقات کے بارے میں بتایا تھا۔ملاقات کو یاد کرتے ہوئے انہوں نے کہا کہ میری اور ایشوریا کی یہ میٹنگ اداکار عامر خان کی فلم ’راجہ ہندوستانی‘ کے مہورت کے موقع پر ہوئی اور میں ایشوریا کی آنکھوں کو دیکھ کر دم بخود رہ گیا تھا۔

1999 میں ریلیز ہونے والی، ہم دل دے چکے صنم نے نہ صرف یہ ثابت کیا کہ ایشوریا صرف ایک خوبصورت چہرے کی ہی حامل نہیں بلکہ انکے سنجے لیلا بھنسالی سے تعلقات اس قدر استوار ہوگئے کہ سنجے لیلا نے اپنی فلموں دیوداس اور گزارش میں بھی ایشوریا کو مرکزی کردار دیا۔

(جاری ہے)

اس حوالے سے ایک بار ایشوریا نے یہ انکشاف بھی کیا تھا کہ سنجے لیلا بھنسالی نے انھیں کئی دیگر فلموں جیسے باجی رائو مستانی اور پدما وتی میں بھی کام کی پیشکش کی تھی۔

ایک بھارتی فلمی میگزین سے گفتگو کرتے ہوئے سنجے لیلا بھنسالی نے کہا تھا کہ ایشوریا کی آنکھوں میں کوئی چیز ہے، اور یہی ان کے حسن کا ایک نہایت اہم پہلو ہے، یہ آنکھیں نارمل نہیں ہیں۔ یہ اس قدر طاقتور ہیں کہ اگر آپ انھیں ڈائیلاگ نہ بھی دیں تو ان کی آنکھیں خود اسکا اظہار کریں گی۔انھوں نے کہا کہ کچھ آنکھوں میں دیویوں کی طاقت ہوتی ہے، جیسی کہ ہیماجی، لتا جی کی آنکھوں میں ایک چمک ہے، لیکن ایشوریا کی آنکھیں خوبصورت، رنگ دار اور نیچر سے بھرپور ہیں، میں جب ان سے پہلی بار ملا تو ان کی آنکھوں کا مجھ پر اثر ہوا تھا۔