فیصل قریشی، ہارون شاہد پی ٹی وی سپورٹس کے سوشل میڈیا اکائونٹ پراعظم خان کی جسمانی ساخت کا تمسخر اڑانے پر برہم

لاہور (اردو پوائنٹ تازہ ترین اخبار ۔ 19 جولائی 2021ء ) اداکار فیصل قریشی اور گلوکاری سے اداکاری کے میدان میں قدم رکھنے والے ہارون شاہد نے پی ٹی وی سپورٹس کے آفیشل سوشل میڈیا اکاؤنٹ کی جانب سے قومی ٹیم کے نوجوان بلے باز اعظم خان کی جسمانی ساخت کا تمسخر اڑانے پر اسے کھری کھری سنادیں۔ غیر حساس پوسٹ شیئر کرنے فیصل قریشی نے اپنے انسٹاگرام اکائونٹ کی سٹوری میں لکھا کہ ’’پی ٹی وی سپورٹس شرم کرو‘‘۔

اسی طرح ہارون شاہد نے انسٹاگرام سٹوری میں لکھا کہ ’’یہ کوئی مذاق نہیں ، پہلے میں نے سوچا کہ یہ ایک جعلی پیج ہے جو پی ٹی وی سپورٹس کے نام سے چل رہا ہے لیکن حیرت کی بات یہ ہے کہ ایسا کچھ نہیں تھا، کیا ہم اپنے کھلاڑیوں کی تضحیک اسی طرح کریں گے‘‘؟۔

(جاری ہے)

یاد رہے کہ سابق پاکستانی کپتان اور وکٹ کیپر بلے باز معین خان کے بیٹے اعظم خان نے حال ہی میں انگلینڈ کے خلاف پہلے ٹی ٹونٹی میں اپنے انٹرنیشنل کیریئر کا آغاز کیا تھا، اس میچ میں اعظم خان نے 3 گیندوں پر5 رنز بنائے جس میں ایک باؤنڈری بھی شامل تھی۔

دوسرے ٹی ٹونٹی میں اعظم خان صرف ایک رن بنا سکے ۔ 22 سالہ اعظم خان کو ڈومیسٹک کرکٹ میں عمدہ کارکردگی پر قومی ٹیم میں شامل کیا گیا تھا۔ انہوں نے پاکستان کپ میں سندھ کیلئے 7 میچز میں 46.50 کی اوسط اور 124.83 کے سٹرائیک ریٹ سے 186 رنز بنائے ، ان کا ٹاپ سکور 69 رنز رہا۔ اعظم خان نے پاکستان سپر لیگ (پی ایس ایل)6 میں کوئٹہ گلیڈی ایٹرز کے لئے 10 میچوں میں 17.40 کی اوسط اور 133.84 کی سٹرائیک ریٹ سے 174 رنز بنائے۔