جماعت اسلامی بلوچستان نے پاکستان میڈیا ڈویلپمنٹ اتھارٹی آرڈیننس کو مسترد کردیا

منگل 14 ستمبر 2021 21:56

کوئٹہ (اُردو پوائنٹ اخبارتازہ ترین - آن لائن۔ 14 ستمبر2021ء) جنرل سیکرٹری جماعت اسلامی بلوچستان ہدایت الرحمان بلوچ ،سیکرٹری اطلاعات جماعت اسلامی بلوچستان عبدالولی خان شاکر نے پاکستان میڈیا ڈویلپمنٹ اتھارٹی آرڈیننس کو مسترد کر تے ہو ئے اسے آزادی صحا فت کا گلہ گھونٹنے کے مترادف قرار دیا ہے۔ انھوں نے کہا میڈیا کی حقیقی معنوں میں آزادی کے بغیرپائیدار جمہوریت کا تصور ممکن نہیں۔

پاکستان میں اس طرح کے ہتھکنڈوں سے میڈیا اور صحا فیوں کو کنٹرول کرنے کی منصوبہ بندی ملکی آئین، قانون اور میڈیا کی آزاد ی کے صریحاً خلاف ہے۔ وزیر اعظم میڈیا کی آزادی کے حوالے سے اپنی گذشتہ تقاریر خود بھی سنیں اور وزیر اطلاعات فواد چو ہدری کو بھی سنائیں۔ انہوں نے کہا کہ جماعت اسلامی پاکستان میں میڈیا کے حقوق کی علمبردار ہے اور اس حوالے سے ہمارے ممبران پارلیمنٹ نے کئی بل بھی پیش کیے۔

(جاری ہے)

پاکستان میڈیا ڈویلپمنٹ اتھارٹی آرڈیننس پرنٹ، الیکٹرانک اور سوشل میڈیا کی آئینی آزادی کو دبانے کے لیے ایک ڈریکونین،آمرانہ، جابرانہ قانون ہے۔ جماعت اسلامی کسی بھی قیمت پرمیڈ یا کے آئینی حقوق غصب کرنے کی اجازت نہیں دے سکتی۔ انھوں نے حکو مت سے مطالبہ کیا کہ وہ اس کالے قانون پر مبنی بل کو فوری طور پر واپس لے۔