دنیا میں مہنگا ترین پٹرول فروخت کرنے والے ممالک کی تفصیلات سامنے آگئیں

ہانگ کانگ میں ایک لیٹر پٹرول کی قیمت 425 روپے جبکہ بھارت میں 245 روپے ہے، وزیر مملکت فرخ حبیب نے پاکستان میں پٹرولیم مصنوعات کی قیمتیں دنیا کے کئی ممالک سے کم ہونے کا دعویٰ کر دیا

محمد علی پیر 20 ستمبر 2021 23:31

لاہور (اُردو پوائنٹ اخبارتازہ ترین۔ 20 ستمبر2021ء) دنیا میں مہنگا ترین پٹرول فروخت کرنے والے ممالک کی تفصیلات سامنے آگئیں۔ تفصیلات کے مطابق وزیر مملکت فرخ حبیب نے پاکستان میں پٹرولیم مصنوعات کی قیمتیں دنیا کے کئی ممالک سے کم ہونے کا دعویٰ کیا ہے، اس حوالے سے ان کی جانب سے کی گئی ٹوئٹس میں خطے کے کچھ ممالک میں پٹرولیم مصنوعات کی موجودہ قیمتوں کا پاکستان میں موجودہ قیمتوں سے موازنہ کیا گیا۔

پاکستانی کرنسی کے مطابق اسوقت ہندوستان میں پیٹرول245روپے تک،بنگلہ دیش 175.33روپے،سعودی عرب104.20روپے،یو اے سی 111.42روپے،چین میں 194 روپے،سری لنکا 154روپے،آذربائجان 98.65روپے ،ہانک گانگ میں425.25روپے فی لیٹر ہے۔پاکستان اب بھی دنیا کے بہت سے ممالک کی نسبت پیڑول سستا فراہم کررہا ہے
— Farrukh Habib (@FarrukhHabibISF) September 17, 2021

فرخ حبیب کا کہنا ہے کہ پاکستانی کرنسی کے مطابق اسوقت ہندوستان میں پیٹرول245روپے تک،بنگلہ دیش 175.33روپے،سعودی عرب104.20روپے،یو اے سی 111.42روپے،چین میں 194 روپے،سری لنکا 154روپے،آذربائجان 98.65روپے ،ہانک گانگ میں425.25روپے فی لیٹر ہے۔پاکستان اب بھی دنیا کے بہت سے ممالک کی نسبت پیڑول سستا فراہم کررہا ہے۔

(جاری ہے)

انہوں نے مزید کہا کہ پیٹرولیم مصنوعات کی قیمتوں پرواویلا کرنے والوں کے ادوارمیں پیٹرولیم مصنوعات پر ٹیکسز کی شرح52فیصد تک رہی۔

ایک سال کے دوران پیٹرولیم مصنوعات کی قیمتوں میں عالمی سطح پر 80% تک اضافہ ہوا۔حکومت نے اپنے ٹیکسز کی شرح میں بتدریج کمی کرکے 18.5فیصد اضافہ کیا ہے۔ واضح رہے کہ وفاقی حکومت نے 15 ستمبر کو تمام ہی پٹرولیم مصنوعات کی قیمتوں میں اضافے کا اعلان کر دیا تھا۔ خاص کر پٹرول کی قیمت میں غیر متوقع اضافہ کیا گیا۔ وفاقی حکومت کی جانب سے پٹرول، ہائی اسپیڈ ڈیزل، مٹی کا تیل تمام ہی پٹرولیم مصنوعات کی قیمتوں میں فی لیٹر 5 روپے سے زائد کا اضافہ کیا گیا، تاہم پٹرول کی قیمت میں کیا گیا اضافہ تنازعے کا باعث بنا۔

میڈیا رپورٹس کے مطابق اوگرا کی جانب سے حکومت کو فی لیٹر پٹرول کی قیمت میں صرف 1 روپے کا اضافہ کرنے کی تجویز دی گئی تھی، تاہم وزارت خزانہ نے 1 روپے کی بجائے 5 روپے اضافے کا نوٹیفیکیشن جاری کر دیا اور پٹرول کی قیمت ملکی تاریخ کی بلند ترین سطح 123 روپے سے تجاوز کر گئی، اسی وجہ سے وفاقی حکومت کو تاحال شدید تنقید کا سامنا کرنا پڑ رہا ہے۔