اتباع رسول ﷺ میں دنیا و آخرت کی کامیابی ہے ،حافظ حامد رضا

مظفر آباد (اُردو پوائنٹ اخبارتازہ ترین - این این آئی۔ 13 اکتوبر2021ء) وزیراعظم آزادکشمیر کے معاون خصوصی برائے امور دینیہ و اوقاف حافظ حامد رضا نے کہا ہے کہ اتباع رسول ﷺ میں دنیا و آخرت کی کامیابی ہے ۔آپ ﷺ کی زندگی ہمارے لیے بہترین نمونہ اورآپﷺ سب سے بہترین رول ماڈل ہیں ۔ نبی اکرم ﷺ صرف مسلمانوں کیلئے نہیں بلکہ کائنات کے ذرے ذرے کیلئے رحمت بن کر آئے ۔

سیر ت طیبہ کا مطالعہ کریں اس میں کامیابی ہی کامیابی ہے ۔ حضور ﷺ کے نقش قدم پر چلیں گے تو سب سے کامیاب ترین زندگی ہوگی۔وزیراعظم پاکستان عمران خان نے خصوصی عشرہ رحمت اللعالمین ﷺ منانے کا فیصلہ کیا جس پر انہیں خراج تحسین پیش کرتے ہیں۔قائد اعظم سیکولر نہیں اسلامی پاکستان چاہتے تھے۔ عمران خان نے ریاست مدینہ کا نعرہ لگایا ۔

(جاری ہے)

ان خیالات کا اظہار انہوں نے محکمہ اوقاف و امور دینیہ کے زیر اہتمام عشرہ رحمت اللعالمین ﷺ کی مناسبت سے رحمت اللعالمین ﷺ کانفرنس سے بطور مہمان خصوصی خطاب کرتے ہوئے کیا۔

تقریب کی صدارت سیکرٹری اوقاف و امور دینیہ سید شاہد محی الدین قادری نے کی ۔ تقریب سے ڈائریکٹر جنرل اوقاف شاہد ایوب ، ڈائریکٹر امور دینیہ حافظ نذیر احمد قادری، مولانا حمید الدین برکتی ، مولانا محمود الحسن اشرف، علامہ عبدالرزاق چشتی ، علامہ منظور الحسن ، علامہ عمران رضا شیرازی، علامہ محمد ندیم، اکرام الحق قادری ویگر نے بھی کانفرنس سے خطاب کیا جبکہ کانفرنس تمام مکاتب فکر کے جید علماء کرام کثیر تعداد میں موجود تھے ۔

مقررین نے نبی رحمت ﷺ کی حیات طیبہ اور سیرت مبارکہ پر روشنی ڈالی اور کلام پیش کیے ۔ معاون خصوصی حافظ حامد رضا نے کہاکہ عمران خان کی ہدایت کے مطابق حکومت آزادکشمیر کے فیصلے کی روشنی میں آزادکشمیربھر میں عشرہ رحمت اللعالمین ﷺ کی تقریبات کا سلسلہ جاری ہے ۔ ریاست مدینہ کا نعرہ لگانے کی توفیق عمران خان ہوئی ، دعا گو ہیں کہ وہ اپنے مشن میں کامیاب ہوں ۔

ماہ ربیع الاول میں عظیم الشان سیرت النبی ﷺ کانفرنس منعقد کروانے جارہے ہیں۔ راولاکوٹ اور میرپور میں بھی رحمت اللعالمین ﷺ کانفرنسز منعقد کروا رہے ہیں ۔انہوں نے کہاکہ دربار سہیلی سرکار کے تعمیراتی کام کی خود نگرانی کررہا ہوں ۔ مزار شریف کی تعمیر کے ساتھ نمازیوں اور زائرین کی سہولیات کیلئے بھی کام کررہے ہیں۔ انہوں نے کہاکہ اللہ رب العزت نبی رحمت ﷺ کے صدقے ہماری زندگیوں میں بہتری لائے اور امت مسلمہ کا وقار بحال کروائے۔

رحمت اللعالمین ﷺ کانفرنس کے کامیاب انعقاد پر سیکرٹری امورددینیہ ، اوقاف اور امور دینیہ کے حکام کو خراج تحسین پیش کرتا ہوں ۔کانفرنس سے خطاب کرتے ہوئے سیکرٹری امور دینیہ و اوقاف سید شاہد محی الدین قادری نے کہا کہ نبی رحمتﷺ وجہ تخلیق کائنات ہیں، آپ ﷺ حیات طیبہ اور سیرت مبارکہ میں دنیاوی و آخروی کامیابی ہے۔ وزیراعظم سردار عبدالقیوم نیازی اور حافظ حامد رضا قادری کی سربراہی کام کررہے ہیں ۔

دربار سہیلی سرکار کی تعمیر کے ساتھ کمپلیکس بھی تعمیر کریں گے ۔انہوں نے کہاکہ وزیراعظم پاکستان عمران خان کو خراج تحسین پیش کرتا ہوں جس طرح انہوں نے گزشتہ برس جنرل اسمبلی میں دنیا کوبتایا کہ نبی ﷺ ہمارے لیے سب سے بڑھ کر ہیں ۔ عمران خان نے جنرل اسمبلی میں دو ارب مسلمانوں کی ترجمانی کی جس پر ان کے شکرگزار ہیں ۔ ڈائریکٹر جنرل اوقاف شاہد ایوب نے کہاکہ تمام علماء کرام کا شکریہ ادا کیا۔

ڈائریکٹر امور دینیہ حافظ نذیر احمد قادری نے کہاکہ حکومت آزادکشمیر کے فیصلے کے مطابق محکمہ اوقاف و امور دینیہ کے زیر اہتمام کل جمعرات کو راولاکوٹ جبکہ ہفتہ کو میرپور کھڑی شریف میں رحمت اللعالمینﷺ کانفرنس کا انعقاد کیا جائیگا ۔ رحمت اللعالمین کانفرنسﷺ کے اختتام پر معاون خصوصی برائے اوقاف و امور دینیہ حافظ حامد رضا نے شہدائے تحریک آزادی کشمیر ، شہدائے زلزلہ ، ڈاکٹر عبدالقدیر خان اور سردار سکندر حیات کے بلندی درجات ،عالم اسلام اور پاکستان کی سلامتی و استحکام کیلئے خصوصی دعا کروائی ۔