لڑکی کی نازیبا ویڈیو بناکر بلیک میل کرنے والا ملزم گرفتار

ملزم نے لڑکی کو بلیک میل کرکے 3 لاکھ روپے بھی وصول کیے، ایف آئی اے

بدھ 1 دسمبر 2021 17:04

لڑکی کی نازیبا ویڈیو بناکر بلیک میل کرنے والا ملزم گرفتار

منڈی بہائو الدین (اُردو پوائنٹ اخبارتازہ ترین - این این آئی۔ 01 دسمبر2021ء) ایف آئی اے نے منڈی بہاوالدین میں کاروائی کرکے لڑکی کو نازیبا ویڈیوز بناکر بلیک میل کرنے والا ملزم گرفتار کرلیا۔ ایف آئی اے حکام کے مطابق سائبر کرائم ونگ نے گوجرانوالہ کے علاقے منڈی بہاوالدین میں کارروائی کرکے لڑکی کو بلیک میل کرنے والا ملزم گرفتار کرلیا، ملزم نے لڑکی کی نازیبا ویڈیوز بنارکھی تھیں اور وہ اسے بلیک میل کرکے پیسے بٹور رہا تھا۔

(جاری ہے)

ایف آئی اے کے مطابق اٹلی میں مقیم ملزم عمر حیات کی بہاؤالدین کی رہائشی لڑکی سے سوشل میڈیا پر دوستی ہوئی، ملزم لڑکی سے ملنے پاکستان آگیا اور شادی کا جھانسہ دے کر اس کی غیر اخلاقی ویڈیوز بنائیں، اور بعد میں لڑکی کو بلیک میل کرکے 3 لاکھ روپے بھی وصول کیے، تاہم جب اس نے مزید 5 لاکھ روپے کا تقاضا کیا تو لڑکی نے گھر والوں کو بتا دیا، جس پر گھر والوں نے ایف آئی اے سے رابطہ کیا، اور ملزم کی گرفتاری عمل میں آئی، ملزم کے خلاف مقدمہ درج کر کے تحقیقات کی جارہی ہیں۔