پنجاب ریونیو اتھارٹی نے صوبہ بھر میں کچی رسیدوں کے اجرا ء پر مکمل پابندی عائد کر دی

پیر 10 اگست 2026 13:15

لاہور(اُردو پوائنٹ اخبارتازہ ترین - این این آئی۔ 10 اگست2026ء) ریسٹورنٹس، میرج ہالز اور دیگر کاروباری مراکز میں بڑے پیمانے پر ٹیکس ادائیگی میں ہیر پھیر کی روک تھام کیلئے پنجاب ریونیو اتھارٹی نے صوبہ بھر میں کچی رسیدوں کے اجرا ء پر مکمل پابندی عائد کر دی۔پی آر اے کی جانب سے اس حوالے سے نوٹیفکیشن جاری کر دیا گیا ہے جس کے مطابق تمام ہوٹلز، ریسٹورنٹس، کافی شاپس اور میرج ہالز میں ای آئی ایم ایس کا نفاذ لازمی ہوگا۔

نوٹیفکیشن کے مطابق ای آئی ایم ایس کے تحت رسید جاری نہ کرنے والے کاروباری مراکز کو 4 لاکھ سے 10 لاکھ روپے تک جرمانہ عائد کیا جائے گا، جبکہ قوانین کی مسلسل خلاف ورزی کرنے والے کاروبار کو ایک ماہ تک سیل بھی کیا جا سکے گا۔کار سرکار میں مداخلت، سیلز ریکارڈ میں خردبرد یا ریکارڈ فراہم نہ کرنے کی صورت میں بھی سخت قانونی کارروائی عمل میں لائی جائے گی۔

(جاری ہے)

پی آر اے کے مطابق صارفین کو کچن آرڈر سلپس، غیر ادا شدہ بل یا اس نوعیت کی دیگر رسیدیں جاری کرنے پر بھی مکمل پابندی ہوگی۔ کاروباری مراکز کیلئے صارفین کو ایسی رسید جاری کرنا لازم ہوگا جس پر کاروبار کا نام، پتہ، رسید نمبر اور پی آر اے کا کیو آر کوڈ درج ہو۔چیئرمین پنجاب ریونیو اتھارٹی معظم اقبال سپرا کی ہدایت پر تمام کمشنرز نے اس حوالے سے نوٹیفکیشن جاری کر دئیے ہیں۔پی آر اے حکام کے مطابق انفورسمنٹ افسران قوانین کی خلاف ورزیوں کی صورت میں فوری کارروائی یقینی بنائیں گے۔