بٹگرام میں یومِ استحصالِ کشمیر منایا گیا، کشمیری عوام سے بھرپور اظہارِ یکجہتی

بٹگرام (اُردو پوائنٹ اخبارتازہ ترین۔ 05 اگست2026ء) ضلعی انتظامیہ بٹگرام نے ڈسٹرکٹ یوتھ آفس بٹگرام کے اشتراک سے گورنمنٹ سینٹینیل ماڈل ہائی سکول بٹگرام میں یومِ استحصالِ کشمیر کے موقع پر ایک پروقار تقریب کا انعقاد کیا، جس کا مقصد مقبوضہ جموں و کشمیر کے عوام سے یکجہتی کا اظہار اور ان کی جدوجہدِ آزادی کی حمایت کرنا تھا۔

تقریب میں ضلعی انتظامیہ، محکمہ سپورٹس، مختلف سرکاری محکموں، محکمہ تعلیم کے افسران، اساتذہ، طلبہ، سول سوسائٹی، تاجر برادری اور صحافیوں نے بڑی تعداد میں شرکت کی۔

شرکاء نے 5 اگست 2019 کو بھارت کی جانب سے مقبوضہ کشمیر کی خصوصی آئینی حیثیت ختم کرنے، آرٹیکل 370 اور 35A کے خاتمے کو مسترد کرتے ہوئے کہا کہ یہ اقدامات بین الاقوامی قوانین، اقوامِ متحدہ کی قراردادوں اور کشمیری عوام کی خواہشات کے خلاف ہیں۔

(جاری ہے)

انہوں نے اس عزم کا اظہار کیا کہ پاکستان کشمیری عوام کے حقِ خودارادیت کی ہر سطح پر حمایت جاری رکھے گا۔

تقریب سے خطاب کرتے ہوئے اسسٹنٹ کمشنر بٹگرام سلیم خان نے کہا کہ نوجوان نسل کو کشمیر کی تاریخی، قومی اور انسانی اہمیت کو سمجھنا چاہیے اور اس مسئلے کو ہر قومی اور بین الاقوامی فورم پر اجاگر کرنا چاہیے۔ انہوں نے کہا کہ نوجوان سوشل میڈیا سمیت تمام ذرائع کا ذمہ داری سے استعمال کرتے ہوئے مقبوضہ کشمیر میں انسانی حقوق کی صورتحال کو دنیا کے سامنے لائیں اور کشمیری عوام کی آواز بنیں۔

ڈائریکٹر یوتھ افیئرز خیبر پختونخوا عباس خان آفریدی نے کہا کہ نوجوان پاکستان کا سب سے قیمتی سرمایہ ہیں اور قومی یکجہتی، امن، انصاف اور سماجی ذمہ داری کے فروغ میں ان کا کردار انتہائی اہم ہے۔ انہوں نے کہا کہ ڈائریکٹوریٹ آف یوتھ افیئرز نوجوانوں میں حب الوطنی، جمہوری اقدار، انسانی حقوق کے احترام اور مثبت سماجی کردار کو فروغ دینے کے لیے مختلف پروگرامز اور سرگرمیوں کا انعقاد جاری رکھے گا تاکہ نوجوان قومی معاملات میں مثبت اور مؤثر کردار ادا کر سکیں۔

شرکاء نے اس بات کا اعادہ کیا کہ یومِ استحصالِ کشمیر کشمیری عوام پر ہونے والے مظالم کی یاد دلاتا ہے اور پاکستان ان کے حقِ خودارادیت کی سیاسی، سفارتی اور اخلاقی حمایت اقوامِ متحدہ کی متعلقہ قراردادوں کے مطابق ہر سطح پر جاری رکھے گا۔

تقریب کے اختتام پر ڈپٹی کمشنر بٹگرام محمد شعیب کی قیادت میں یکجہتی کشمیر ریلی نکالی گئی، جس میں سرکاری افسران، اساتذہ، طلبہ، نوجوان رضاکاروں اور سول سوسائٹی کے نمائندوں نے شرکت کی۔

شرکاء نے کشمیری عوام سے اظہارِ یکجہتی کیا اور ان کے جائز حقِ خودارادیت کی حمایت کے عزم کا اعادہ کیا۔

یہ تقریب حکومتِ خیبر پختونخوا کی یومِ استحصالِ کشمیر کی تقریبات کا حصہ تھی، جس کا مقصد نوجوانوں میں قومی شعور، حب الوطنی، سماجی ذمہ داری اور قومی اہمیت کے حامل مسائل سے متعلق آگاہی کو فروغ دینا ہے۔