سماءنیوز سے صحافیوں کی جبری برطرفیوں پر تشویش، پی ایف یو جے ایف ای سی رکن کا عالمی صحافتی تنظیم سے نوٹس لینے کا مطالبہ

میڈیا اداروں میں بغیر شفاف طریقہ کار، قانونی تقاضے پورے کیے بغیر اور محنت کش صحافیوں کے بنیادی حقوق کا خیال رکھے بغیر ملازمین کو فارغ کرنا قابل افسوس ہے. سردارطیب خان

میاں محمد ندیم ہفتہ 11 جولائی 2026 19:32

سماءنیوز سے صحافیوں کی جبری برطرفیوں پر تشویش، پی ایف یو جے ایف ای سی ..

اسلام آباد(اردوپوائنٹ اخبارتازہ ترین-انٹرنیشنل پریس ایجنسی۔11 جولائی ۔2026 ) پاکستان فیڈرل یونین آف جرنلسٹس (PFUJ) کی فیڈرل ایگزیکٹو کونسل سردار طیب خان نے سماءنیوز سے صحافیوں کی مبینہ جبری برطرفیوں پر شدید تشویش کا اظہار کرتے ہوئے کہا ہے کہ ایسے اقدامات نہ صرف درجنوں صحافیوں اور ان کے خاندانوں کے معاشی مستقبل کو غیر یقینی بناتے ہیں بلکہ آزادی صحافت، صحافیوں کے پیشہ ورانہ تحفظ اور عوام کے حقِ معلومات کے لیے بھی سنگین خطرہ ہیں.

(جاری ہے)

اپنے بیان میں سردار طیب خان نے کہا کہ میڈیا اداروں میں بغیر شفاف طریقہ کار، قانونی تقاضے پورے کیے بغیر اور محنت کش صحافیوں کے بنیادی حقوق کا خیال رکھے بغیر ملازمین کو فارغ کرنا قابل افسوس ہے انہوں نے زور دیا کہ میڈیا صنعت میں ملازمت کا تحفظ، لیبر قوانین پر عمل درآمد اور صحافیوں کے آئینی و پیشہ ورانہ حقوق کا احترام ہر ادارے کی ذمہ داری ہے.

انہوں نے متاثرہ صحافیوں کے ساتھ مکمل یکجہتی کا اظہار کرتے ہوئے مطالبہ کیا کہ سماءنیوز انتظامیہ برطرفیوں کے حوالے سے مکمل شفافیت اختیار کرے، تمام قانونی تقاضے پورے کرے اور متاثرہ صحافیوں کو انصاف فراہم کیا جائے. سردار طیب خان نے انٹرنیشنل فیڈریشن آف جرنلسٹس (IFJ) سے بھی اپیل کی کہ وہ اس معاملے کا فوری نوٹس لے، پاکستان فیڈرل یونین آف جرنلسٹس (PFUJ) کے ساتھ بھرپور یکجہتی کا اظہار کریں اور پاکستان میں صحافیوں اور میڈیا ورکرز کے حقوق، روزگار کے تحفظ اور آزادی صحافت کے دفاع کے لیے مو¿ثر کردار ادا کریں.

انہوں نے کہا کہ صحافت صرف ایک پیشہ نہیں بلکہ جمہوریت کا بنیادی ستون ہے اور صحافیوں کا تحفظ، باوقار روزگار اور آزادانہ ماحول میں فرائض کی انجام دہی یقینی بنانا ریاست، میڈیا مالکان اور تمام متعلقہ اداروں کی مشترکہ ذمہ داری ہے انہوں نے اس عزم کا اعادہ کیا کہ پی ایف یو جے ہر ایسے صحافی کے ساتھ کھڑی رہے گی جس کے روزگار، وقار یا پیشہ ورانہ آزادی کو نقصان پہنچانے کی کوشش کی جائے گی.