بغیر ہیلمٹ کے ڈرائیونگ کرنے پر 17ہزار 762موٹر سائیکل سواروں کےخلاف کارروائی

جمعہ 3 دسمبر 2021 15:31

پشاور۔(اُردو پوائنٹ اخبارتازہ ترین - اے پی پی۔ 03 دسمبر2021ء) :سٹی ٹریفک پولیس پشاور نے بغیر ہیلمٹ کے ڈرائیونگ کرنے پر گزشتہ ماہ 17ہزار762موٹر سائیکل سواروں کے خلاف کارروائی کی ہے ۔ تفصیلات کے مطابق چیف ٹریفک آفیسر عباس مجید خان مروت کی ہدایت پر سٹی ٹریفک پولیس پشاور کی ایجوکیشن ٹیموں نے شہر کے تمام سیکٹروں میں شہریوں میں پمفلٹس تقسیم کئے اور باقاعدہ انہیں ہیلمٹ کے استعمال کے فوائد اور نقصانات بارے آگاہی دی بعد ازاں ٹریفک عملے نے ہیلمٹ کے بغیر ڈرائیونگ کرنے پر17ہزار762موٹر سائیکل سواروں کو چالان کیا ۔

(جاری ہے)

عباس مجید نے کہا ہے کہ شہری موٹر سائیکل چلاتے وقت ہیلمٹ کا استعمال ضرور کریں کیونکہ کسی حادثے کی صورت میں ہیلمٹ کے استعمال سے جانی نقصان سے بچنا ممکن ہے۔ انہوں نے کہا کہ بغیر ہیلمٹ کے موٹر سائیکل پر سفر کرنا موت کو دعوت دینے کے مترادف ہے کیونکہ موٹر سائیکل کی ڈرائیونگ مکمل طور پر غیر محفوظ ہے اس پر سفر کرتے وقت شہری ہیلمٹ کا استعمال یقینی بنائیں اور اوور سپیڈنگ سے گریز کریں۔ انہوں نے کہا کہ ہیلمٹ کے استعمال سے سرمیں چوٹ لگنےسے بچا جا سکتا ہے، شہری ٹریفک قوانین پر عملدرآمد کو یقینی بنائیں اور اپنی اور دوسروں کی زندگیوں کا خیال رکھیں۔