ڈی ڈبلیو 
اسلام آباد (اُردو پوائنٹ ۔ DW اردو۔ 05 دسمبر 2021ء) خبر رساں ادارے روئٹرز نے ایران کے سرکاری میڈیا کا حوالہ دیتے ہوئے بتایا ہے کہ متحدہ عرب امارات کے سکیورٹی مشیر شیخ طحنون بن زائد النہیان کل بروز پیر تہران کے دورے پر پہنچ رہے ہیں۔
ایرانی نور نیوز کے مطابق شیخ طحنون کی ایرانی سپریم نیشنل سکیورٹی کونسل کے سیکریٹری جنرل علی شامخانی اور دیگر اعلیٰ سطحی اہلکاروں سے ملاقات متوقع ہے۔
شامخانی اور شیخ طحنون دوطرفہ تعلقات کو وسعت دینے پر تبادلہ خیال کریں گے۔ابو ظہبی کے ولی عہد محمد زائد کے بھائی شیخ طحنون کے تہران کے دورے کے بارے میں متحدہ عرب امارات کی وزارت خارجہ کی جانب سے ابھی تک کوئی بیان جاری نہیں کیا گیا۔
روئٹرز کے مطابق شامی وزیر خارجہ فیصل مقداد بھی دو روزہ دورے کے لیے تہران پہنچ چکے ہیں۔
(جاری ہے)
شیخ طحنون کا تہران کا دورہ ایسے وقت ہورہا ہے جب ایک ہفتہ قبل ہی سن 2015 کے ایران جوہری معاہدے کو بحال کرنے، ایران پر امریکی پابندیاں ہٹانے اور تہران کے جوہری پروگرام میں اضافے کو روکنے کے لیے ویانا میں مذاکرات دوبارہ شروع ہوئے ہیں۔
دریں اثناء فرانسیسی خبر رساں ادارے کی اطلاعات کے مطابق ایران کے چیف جوہری مذاکرات کار علی بغیری بھی شیخ طحنون سے ملاقات کریں گے۔
علاوہ ازیں متحدہ عرب امارات کے صدر کے سفارتی امور کے مشیر انور گرگاش نے گزشتہ ماہ کہا تھا کہ ان کا ملک ایران کے ساتھ کشیدگی کو کم کرنے کے لیے محاذ آرائی سے اجتناب کرتے ہوئے سفارت کاری کی پالیسی کے اقدامات کر رہا ہے۔ تاہم متحدہ عرب امارات ایران کے عراق، شام، یمن اور لبنان میں برتاؤ پر گہری تشویش رکھتا ہے۔
رواں برس اپریل میں سعودی عرب نے بھی ایران کے ساتھ براہ راست بات چیت کا آغاز کیا تھا، جو کہ ان دونوں سنّی اور شیعہ حریف مسلم ملکوں کے درمیان کشیدگی کو کم کرنے کے عمل کا حصہ تھا۔
ع آ / ب ج (روئٹرز، اے ایف پی)
