حوثی باغیوں کا سعودی عرب کے شہر جازان پر میزائل حملہ

حوثی ملیشیا نے سعودیہ کے جنوب مغربی علاقے کو نشانہ بنانے کی کوشش کی‘ جازان میں ایک میزائل روایتی بازاروں کے قریب ایک سڑک پر آکر گرا۔ عرب اتحاد

ساجد علی بدھ 8 دسمبر 2021 11:29

حوثی باغیوں کا سعودی عرب کے شہر جازان پر میزائل حملہ

ریاض ( اُردو پوائنٹ اخبارتازہ ترین ۔ 08 دسمبر 2021ء ) حوثی باغیوں نے سعودی عرب کے جنوب مغربی علاقے کو نشانہ بنانے کی کوشش کی‘ جازان میں ایک میزائل روایتی بازاروں کے قریب ایک سڑک پر آکر گرا۔ عرب نیوز کے مطابق سرکاری ٹی وی نے رپورٹ کیا ہے کہ حوثی ملیشیا کی جانب سے نے منگل کی شام سعودی عرب کے جنوب مغربی علاقے کو نشانہ بنانے کی کوشش کی گئی ، اس حوالے سے عرب اتحاد نے بتایا کہ جازان میں ایک میزائل عوامی سڑکوں اور روایتی بازاروں میں سے ایک کے قریب گرا ، حوثیوں کی جان بوجھ کر اور منظم طریقے سے شہریوں کو نشانہ بنانے کی کوشش بین الاقوامی انسانی قانون کی صریح خلاف ورزی ہے۔

خیال رہے کہ حوثیوں نے اتوار سے مملکت کے جنوبی علاقے کو نشانہ بنانے والے متعدد ڈرونز اور بیلسٹک میزائلوں کا آغاز کیا ہے اور پیر کے روز دارالحکومت ریاض کو بیلسٹک میزائلوں سے نشانہ بنایا تھا ، جن میں سے سب کو سعودی فضائی دفاع نے روک کر تباہ کر دیا تھا ، ان میں سے ایک میزائل ریاض کے کچھ محلوں میں گرا جس سے کوئی نقصان نہیں ہوا۔

(جاری ہے)

اس سے قبل سعودی عرب کے فضائی دفاع نے مملکت کو نشانہ بنانے والے حوثی ڈرونز کو تباہ کیا ، عرب اتحاد نے کہا ہے کہ حوثی باغیوں کی طرف سے داغے گئے کئی ڈرونز مار گرائے ، اس دوران سعودی دفاع نے جنوبی علاقے کو نشانہ بنانے کی کوشش کرنے والے چار ڈرونز کو روک کر تباہ کر دیا ، یہ کارروائی ایسے وقت میں ہوئی ہے جب عرب اتحادی افواج حالیہ ہفتوں میں ملیشیا کے اثاثوں کو ختم کر رہی ہیں جن میں ہتھیار اور اہلکار شامل ہیں۔

ملیشیا اکثر بارود سے بھرے ڈرونز اور بیلسٹک میزائلوں کا استعمال کرتے ہوئے مملکت کے جنوبی علاقے میں آبادی والے علاقوں کو نشانہ بناتے ہوئے سرحد پار سے حملے کرتی ہے ، یہ گروپ، جس نے 2014 میں یمنی دارالحکومت پر قبضہ کیا تھا، بین الاقوامی سطح پر تسلیم شدہ حکومت کے خلاف برسرپیکار ہے ، جب کہ یمن کی اس حکومت کو سعودی عرب کی قیادت میں عرب اتحاد کی حمایت حاصل ہے۔