نیشنل کرائم ایجنسی نے شہباز شریف کو منی لانڈرنگ الزامات میں بے گناہ قرار دے دیا

شہباز شریف کے خلاف تحقیقات پاکستانی حکومت کے کہنے پر شروع ہوئی تھیں،ثبوت نہ ملنے پر این سی اے نے شہباز شریف اور سلمان شہباز کے خلاف کرمنل انویسٹی گیشن ختم کر دی

مقدس فاروق اعوان بدھ 9 فروری 2022 16:10

اسلام آباد(اُردو پوائنٹ اخبارتازہ ترین۔ 09 فروری2022ء) نیشنل کرائم ایجنسی نے شہباز شریف کو منی لانڈرنگ الزامات میں بے گناہ قرار دے دیا۔دنیا نیوز کی رپورٹ کے مطابق نیشنل کرائم ایجنسی نے شہباز شریف کو منی لانڈرنگ الزامات میں بے گناہ قرار دے دیا ہے۔شہباز شریف کے خلاف تحقیقات پاکستانی حکومت کے کہنے پر شروع ہوئی تھیں۔نیشنل کرائم ایجنسی نے دسمبر 2019ء میں شہباز شریف اور سلیمان شہباز کے اثاثے ضبط کر لیے تھے۔

ثبوت نہ ملنے پر این سی اے نے شہباز شریف اور سلمان شہباز کے خلاف کرمنل انویسٹی گیشن ختم کر دی۔خیال رہے کہ 21 ماہ کی تحقیقات اور 20 سال کے مالی معاملات کا جائزہ لینے کے بعد برطانوی عدالت نے شہباز شریف اور ان کے خاندان کو منی لانڈرنگ اورمجرمانہ سرگرمیوں کے الزامات سے بری کردیا تھا۔

(جاری ہے)

میڈیا رپورٹ کے مطابق عدالت نے منجمد اکاؤنٹس بھی بحال کرنے کا حکم دیدیا، نیشنل کرائم ایجنسی نے شہباز شریف اور ان کے بیٹے سلیمان شریف کے منجمد بینک اکاؤنٹس کی تحقیقاتی رپورٹ ویسٹ منسٹر کورٹ میں جمع کروادی۔

رپورٹ کے مطابق شہباز شریف اور ان کے خاندان کے بینک اکاؤنٹس میں منی لانڈرنگ، کرپشن اور مجرمانہ سرگرمی کا کوئی ثبوت سامنے نہیں آیا۔شہباز شریف اور سلیمان شہباز کے بینک اکاؤنٹس دسمبر 2019 کو عدالتی حکم پر منجمد کیے گئے تھے۔برطانوی ایجنسی نے حکومت پاکستان، نیب اور ایسٹ ریکوری یونٹ کی درخواست پر تحقیقات شروع کی تھیں، تحقیقات کے دوران شہباز شریف اور شریف خاندان کے برطانیہ اور یو اے ای میں اکائونٹس کی چھان بین کی گئی۔ پاکستان مسلم لیگ (ن) نے نیشنل کرائم ایجنسی کی رپورٹ اور لندن کی عدالت کے فیصلے پر حکومت سے پاکستانی قوم سے معافی مانگنے کا مطالبہ کرتے ہوئے کہا تھا کہ نیشنل کرائم ایجنسی جج ارشد ملک کی طرح نہیں جس پر دبائو ڈال کر فیصلے لئے جا سکیں ۔