لوٹے کو ڈمی اپوزیشن لیڈر بنا کر چیئرمین نیب کی تعیناتی کا پراسیس کیا جا رہا ہے، فواد چوہدری

ملک کے مسائل زیادہ گھمبیر ہیں، مہنگائی کا ایک طوفان ملک میں آگیا ہے مزید آنے والا ہے،سابق وزیر

ہفتہ 28 مئی 2022 17:00

اسلام آباد (اُردو پوائنٹ اخبارتازہ ترین - این این آئی۔ 28 مئی2022ء) پاکستان تحریک انصاف کے رہنما اور سابق وفاقی وزیر فواد چوہدری نے کہا ہے کہ ایک لوٹے کو ڈمی اپوزیشن لیڈر بنا کر چیئرمین نیب کی تعیناتی کا پراسیس کیا جا رہا ہے۔ہائی کورٹ کے باہر میڈیا سے گفتگو کرتے ہوئے فواد چوہدری نے کہا کہ جو مقدمات کیے گئے ہیں یہ تو لیگل پراسس ہے چلتا رہے گا، اسلام آباد میں بھی ایف آئی آرز درج کی گئی ہیں۔

انہوں نے کہا کہ ملک کے مسائل زیادہ گھمبیر ہیں، مہنگائی کا ایک طوفان ملک میں آگیا ہے مزید آنے والا ہے۔فواد چوہدری نے کہا کہ حکومت نے ای سی ایل سے نام نکالے، پراسیکیوٹرز اور تفتیشی ٹیمیں تبدیل کی گئیں، حکومت کی تمام تر توجہ اپنے کیسز کی طرف ہے۔پی ٹی آئی رہنما نے کہا کہ حکومت کو عوامی حمایت حاصل نہیں جس سے معاملات مزید خراب ہوں گے۔

(جاری ہے)

فواد چوہدری نے کہا کہ اوورسیز پاکستانیوں کا ووٹ کا حق ختم کیا گیا، حکومت اب چیئرمین نیب لگانے جارہی ہے۔اپنی بات کو جاری رکھتے ہوئے فواد چوہدری نے کہا کہ ایک لوٹے کو ڈمی اپوزیشن لیڈر بنا کر چیئرمین نیب کی تعیناتی کا پراسیس کیا جا رہا ہے۔ان کا کہنا تھا کہ جسٹس (ر) مقبول باقر معقول آدمی ہیں، امید ہے وہ اس پراسیس کا حصہ نہیں بنیں گے۔فواد چوہدری نے کہا کہ فی الحال پارٹیوں کے اندر سے آوازیں اٹھنا شروع ہو گئی ہیں کہ الیکشن ہونے چاہئیں،حکومت کی حکمت عملی سے متعلق انہوںنے کہاکہ مجھے لگتا ہے کہ یہ مزید سیاسی غلطیاں کریں گے۔