راولپنڈی ضمنی انتخاب: الیکشن کمیشن نے وزیراعظم کو کہوٹہ میں ڈیم کے افتتاح سے روک دیا

ضابطہ اخلاق پر عملدرآمد کیلئے وزیراعظم نے ڈیم کا افتتاح منسوخ کردیا،پرنسپل سیکرٹری نے وزیراعظم کا دورہ منسوخ ہونے کے بارے میں آگاہ کر دیا

منگل 28 جون 2022 22:40

اسلام آباد (اُردو پوائنٹ اخبارتازہ ترین - این این آئی۔ 28 جون2022ء) الیکشن کمیشن نے وزیراعظم شہباز شریف کو کہوٹہ میں ڈیم کا افتتاح کرنے سے روک دیا۔لاہور سے ترجمان الیکشن کمیشن پنجاب کے مطابق الیکشن کمیشن نے وزیراعظم کو ضابطہ اخلاق کی خلاف ورزی سے روک دیا۔ ترجمان کا کہنا ہے کہ وزیراعظم شہباز شریف (آج) بدھ کو کہوٹہ میں ڈیم کا افتتاح کرنے والے تھے۔

ترجمان کے مطابق مذکورہ علاقہ پی پی 7 راولپنڈی کی حدود میں شامل ہے۔

(جاری ہے)

ڈسٹرکٹ ریٹرننگ آفیسر نے وزیر اعظم کے پرنسپل سیکرٹری سے رابطہ کیا اور کہا کہ ضابطہ اخلاق پر عملدرآمد کیلئے وزیراعظم نے ڈیم کا افتتاح منسوخ کردیا۔دریں اثنا پرنسپل سیکرٹری نے وزیراعظم کا دورہ منسوخ ہونے کے بارے میں آگاہ کر دیا ہے۔الیکشن کمیشن کے مطابق ضمنی انتخاب والے حلقے میں عوامی عہدیداران کا دورہ کرنا ضابطہ اخلاق کی خلاف ورزی ہے۔ انتخابی شیڈول کے اعلان کے بعد ترقیاتی منصوبوں کا افتتاح کرنا بھی ضابطہ اخلاق کی خلاف ورزی ہے۔الیکشن کمیشن غیرجانبدارانہ طور پر اپنی ذمہ داریاں سرانجام دیتا رہے گا۔