خصوصی ڈسکاؤنٹ آفر‘ شوقین افراد کا شدید گرم موسم میں بھی ڈیزرٹ سفاری کیلئے صحرا کا رخ

دبئی ( اُردوپوائنٹ اخبارتازہ ترین ۔ 19 اگست 2022ء ) متحدہ عرب امارات میں خصوصی ڈسکاؤنٹ ملنے پر شوقین افراد نے شدید گرم موسم میں بھی ڈیزرٹ سفاری کیلئے صحرا کا رخ کرلیا۔ خلیج ٹائمز کے مطابق دیرا ٹریولز کے وویک مینن نے کہا کہ عام طور پر جون اور جولائی ہمارے لیے کافی کم مانگ کا دورانیہ ہوتا ہے تاہم اس سال مانگ غیر معمولی طور پر زیادہ رہی اور اس کی ایک وجہ گاڑیوں کی کمی ہے کیوں کہ کورونا کے دوران بہت سی کمپنیوں اور نجی ڈرائیوروں نے اپنی گاڑیاں فروخت کیں، جس کی وجہ سے اس وقت سرکٹ پر گاڑیاں کم ہیں۔

ریپٹر ٹیم ٹورازم کے فواز بن عبدالخادر نے اس سے اتفاق کرتے ہوئے کہا کہ گاڑیوں کی عالمی قلت کے باعث ہم نئی یا سیکنڈ ہینڈ کاریں خریدنے کے قابل نہیں ہیں، اس سے مانگ میں اضافہ ہوا ہے، یہ سال شاید ماضی قریب میں ہماری بہترین گرمیوں میں سے ایک تھا تاہم اگست میں صحرائی سفاریوں کی مانگ میں قدرے کمی آئی اور یہ پچھلے مہینوں جیسا نہیں ہے، ہماری ویک اینڈ ڈرائیوز اب بھی کافی بھر پور چل رہی ہیں لیکن ہمارے ہفتے میں کام کے دن صحرائی سفاری کیمپ تقریباً 25 فیصد سستے ہیں، ہم طویل مدتی صارفین اور رہائشیوں کو ترجیحی نرخ دیتے ہیں، اس لیے بعض اوقات ہم 20 سے 25 فیصد ڈسکاؤنٹ کو ان لوگوں تک بڑھا دیتے ہیں جو طویل عرصے سے ہمارے گاہک ہیں، ایئر کنگ ٹریول اینڈ ٹورازم سے عاصم رحیم نے کہا کہ ہماری قیمتیں کم کرنے سے مارکیٹ متاثر ہوگی لہٰذا ہم اپنی قیمتیں مارکیٹ کے معیار کے مطابق رکھتے ہیں، ڈیزرٹ سفاری کا ایک عمدہ تجربہ 125 سے 150 درہم کے درمیان ہو سکتا ہے تاہم اس پر منحصر ہے کہ گاہک کیا چاہتا ہے۔

(جاری ہے)

ریپٹر ٹیم ٹورازم کے فواز نے کہا کہ بہت سے لوگ ہوٹلوں اور سیاحتی مقامات پر سستی قیمتوں کا فائدہ اٹھانے کے لیے دبئی آ رہے ہیں، دبئی کے ہوٹلوں اور ریزورٹس میں جس قسم کی سہولیات کی پیشکش کی جاتی ہے، اس کی قیمت انتہائی مسابقتی ہے اور لوگ اسے تسلیم کر رہے ہیں سیاحوں کے آنے کی ایک وجہ یہی ہے۔ انیشا ٹریول اینڈ ٹورازم سے تعلق رکھنے والی انیشا مکل نے کہا کہ ہم خاص طور پر ہندوستان سے بہت زیادہ پوچھ گچھ دیکھ رہے ہیں، ہمارے پاس لوگ ایسے پیکجز خرید رہے ہیں جن میں سیر و تفریح ​​کے بہت سے اختیارات شامل ہیں، اس سے انہیں پیسے کی بڑی بچت ملتی ہے۔

فواز بن عبدالخادر نے کہا کہ جب سے اسرائیلیوں نے یہاں آنا شروع کیا ہے، وہ ہر چیز کو آزمانے کے لیے بے تاب ہیں، صحرائی سفاری ان کے لیے ایک بڑی کشش ہے، صحرائی سفاریوں کے لیے جانے کے خواہشمندوں کے لیے گرمی کوئی بڑی رکاوٹ نہیں رہی، گرمیوں کے دوران ہمارا پک اپ تھوڑی دیر بعد ہوتا ہے لہذا ہم شام کو تقریباً 3.30 بجے لوگوں کو کہیں سے اٹھا لیتے ہیں اور ڈرائیو کے بعد گاہک شام 6.30 بجے سے پہلے کیمپوں میں نہیں پہنچ پاتے تب تک گرمی کچھ کم ہو جاتی ہے کیوں کہ صحرا میں ہمیشہ ہلکی سی ہوا چلتی ہے اور نمی نسبتاً کم ہے اس لیے لوگ واقعی گرمی کو زیادہ محسوس نہیں کرتے۔