نوجوان نسل کو نشہ سے بچانے کیلئے آگاہی کا دائرہ مزیدوسیع ہونا چاہیے ، ڈاکٹرامتیازاحمد ڈوگر

بدھ 30 نومبر 2022 17:22

فیصل آباد (اُردو پوائنٹ اخبارتازہ ترین - اے پی پی۔ 30 نومبر2022ء) چیئرمین ڈیپارٹمنٹ آف سائیکاٹری فیصل آباد میڈیکل یونیورسٹی پروفیسر ڈاکٹر امتیاز احمد ڈوگرنے کہا کہ نوجوان نسل کو نشہ سے بچانے کیلئے آگاہی کا دائرہ مزیدوسیع ہونا چاہیے تاکہ انہیں اس لعنت سے دور اور معاشرے کو اس برائی سے بچایا جاسکے۔یہ بات انہوں نے انجمن انسدادمنشیات ڈسٹرکٹ ہیڈ کوارٹرز ہسپتال کے زیراہتمام آگاہی تقریب سے خطاب کرتے ہوئے کہی۔

اس موقع پرجنرل سیکر ٹری محمد انوار خاں، ڈاکٹر رضوانہ تنویر، اینٹی نارکوٹکس فورس کے معشوق علی،نائب صدر محمد پرویز، ڈائریکٹر سٹوڈنٹس افیئرز جی سی ویمن یونیورسٹی اسما عزیز، خلود اصغر اور دیگربھی موجود تھے۔پروفیسر ڈاکٹر امتیاز احمد ڈوگرنے کہا کہ تابناک مستقبل کیلئے نوجوان نسل کو اس لت سے حتی المقدور دور رہنا چاہیے کیونکہ نشہ انسان کو تنزلی میں دھکیل دیتا ہے اور دین اسلام نے بھی اس سے باز رہنے کی تلقین کی ہے۔

(جاری ہے)

انہوں نے خصوصی طور پرطلبہ پر زور دیا کہ وہ اپنی تمام تر توجہ حصول علم پر مرکوز رکھیں اور نشہ سمیت دیگر برائیوں سے دور رہیں۔انہوں نے کہا کہ نشہ کے نقصانات سے آگاہی کیلئے سیمینارز،واکس اور دیگر معلوماتی پروگرامزتسلسل کے ساتھ جاری رہنے چاہئیں۔جنرل سیکرٹری محمد انوار خان نے نشہ کی اقسام،اس کے معاشی ومعاشرتی زندگی پر اثرات اوراس سے پیداہونیوالی بیماریوں کی تفصیلات پر روشنی ڈالی اورکہاکہ ڈی ایچ کیو میں نشہ کے عادی افراد کی بحالی کیلئے سنٹر ہمہ وقت فنکشل ہے جہاں ایسے افراد کی کو نسلنگ کر کے انہیں معاشرے کاکارآمد شہری بنایا جارہاہے۔

جنرل سیکرٹری نے انجمن انسدادمنشیات کی کارکردگی سے بھی آگاہ کیا اور کہا کہ معاشرے کو اس لت سے دور رکھنے کیلئے اقدامات کئے جارہے ہیں۔انہوں نے تقریب میں شرکت کرنے والے مہمانوں کا شکریہ ادا کیا اور کہا کہ نشہ کے خلاف جنگ جاری رہے گی۔انہوں نے کہا کہ نشہ کے خلاف نفرت بیدار کرنے کیلئے آگاہی پروگرامز ناگزیر ہیں لہٰذااس ضمن میں آئندہ بھی اقدامات جاری رکھے جائیں گے۔