پولیس فواد چوہدری کو لیکر اسلام آباد پہنچ گئی

اسلام آباد ( اُردو پوائنٹ اخبارتازہ ترین ۔ 25 جنوری 2023ء ) پولیس تحریک انصاف کے رہنما فواد چوہدری کو لیکر اسلام آباد پہنچ گئی،ایف 8 کچہری میں پولیس کی بھاری نفری طلب کر لی گئی ہے۔ میڈیا رپورٹس کے مطابق لاہور سے گرفتار ہونے والے تحریک انصاف کے رہنما فواد چوہدری کو اسلام آباد پہنچا دیا گیا،پولیس فواد چوہدری کو لیکر اسلام آباد پہنچی۔ فواد چوہدری کو کچھ دیر میں ایف 8 کچہری پیش کیا جائے گا۔

ایف 8 کچہری میں پولیس کی بھاری نفری کو طلب کر لی گئی جبکہ پولیس افسران اور اہلکاروں کو کچہری پہنچنے کی ہدایت بھی کر دی گئی ہے،سروسز ہسپتال میں طبی معائنے کے بعد پولیس فواد چوہدری کو لیکر اسلام آباد روانہ ہوئی۔ یاد رہے کہ لاہور ہائی کورٹ نے گرفتار پی ٹی آئی رہنماء فواد چوہدری کو 6 بجے ہر صورت پیش کرنے کا حکم دے رکھا ہے۔

(جاری ہے)

پاکستان تحریک انصاف کے رہنماؤں کی جانب سے لاہور ہائی کورٹ میں فواد چودھری کی بازیابی کے لئے دائر درخواست پر جسٹس طارق سلیم شیخ نے سماعت کی، ایڈیشنل ایڈووکیٹ جنرل پنجاب نے کہا کہ عدالتی حکم کی تعمیل کر دی گئی اور آپ کا آرڈر آگے پہچا دیا گیا، عدالت نے قرار دیا کہ یہ باتیں چھوڑیں پہلے بتائیں فواد چوہدری کہاں ہے؟ سرکاری وکیل نے کہا کہ فواد چوہدری پنجاب پولیس کے پاس ہے۔

جسٹس طارق سلیم شیخ نے ریمارکس دئیے کہ مجھے اپنے حکم پر عملدرآمد کروانا آتا ہے‘ آرڈر پر عملدر آمد کریں اور بندہ پیش کریں۔ جسٹس طارق سلیم شیخ نے ایڈیشنل ایڈووکیٹ جنرل پنجاب سے سوال کیا کہ آئی جی کو بلوایا؟ جس پر انہوں نے کہا کہ آئی جی رحیم یار خان سے لاہور سفر کر رہے ہیں، لاہور ہائی کورٹ نے آئی جی پنجاب اور آئی جی اسلام آباد کو بھی شام 6 بجے عدالت طلب کرتے ہوئے تب تک سماعت ملتوی کردی۔

اس سے پہلے عدالت نے فواد چوہدری کو ڈیڑھ بجے پیش کرنے کا حکم دیا تھا، تاہم فواد چوہدری کو عدالت پیش نہ کیا جا سکا، فواد چوہدری کو مقررہ وقت پر عدالت پیش نہ کرنے پر جسٹس طارق سلیم شیخ نے برہمی کا اظہار کرتے ہوئے انہیں فوری پیش کرنے کا حکم دیا۔ اس پر ایڈووکیٹ جنرل پنجاب نے فواد چودھری سے متعلق لاعلمی کا اظہار کرتے ہوئے عدالت کے سامنے مؤقف اختیار کیا کہ میرے علم میں نہیں کہ فواد چودھری کہاں ہیں؟