حرا خان ارسلان خان کے ساتھ رشتہ ازدواج میں منسلک ہوگئی

تصاویر ، ویڈیوز سوشل میڈیا پر وائرل،مداحوں اور ساتھی فنکاروں کی نوبیاہتا جوڑے کو مبارکباد

پیر 13 فروری 2023 20:49

کراچی (اُردو پوائنٹ اخبارتازہ ترین - این این آئی۔ 13 فروری2023ء) پاکستان شوبز انڈسٹری کی ابھرتی ہوئی اداکارہ حرا خان اور ماڈل و اداکار ارسلان خان رشتہ ازدواج میں منسلک ہوگئے۔ ان کی شادی کی مختلف تقریبات سے ویڈیو سوشل میڈیا پر خوب وائرل ہو رہی ہیں۔شیندی سے قبل مہندی لگائی اور مہندی نائٹ کا اہتمام کیا گیا جس میں شوبز انڈسٹری کے کئی ستاروں نے اپنے رقص کے جلوے بکھیرے۔

(جاری ہے)

مہندی لگائی کے موقع پر حرا خان سبز جبکہ ارسلان خان نے سرمائی رنگ کے جوڑے کا انتخاب کیا جس میں دونوں خوب جاذب نظر آئے۔مہندی نائٹ میں ناصرف حرا خان اور ارسلان خان بلکہ کئی فنکاروں نے دھمال ڈالا جن میں اداکارہ درفشاں اور اداکار شان شاہد کی بھتیجی اور ماڈل نتالیہ شاہد قابل ذکر ہیں۔ اس موقع پر حرا خان اور ارسلان خان نے نارنجی رنگ کی تھیم کو اپنایا۔شادی کی تقریب میں نوبیاہتا جوڑے نے ہلکے گلابی رنگ کا انتخاب کیا اور اسی رنگ کے لباس زیب تن کئے۔ ویڈیوز کے وائرل ہونے کے بعد ان کے بہت سے مداح اور ساتھی فنکار نوبیاہتا جوڑے کو مبارکباد دے رہے ہیں۔