کوہاٹ، نامعلوم مسلح افراد کی موٹرسائیکل سواروں پر فائرنگ ،دو قبائلی جان سے ہاتھ دھوبیٹھے ،ایک زخمی

منگل 14 مارچ 2023 23:32

کوہاٹ(اُردو پوائنٹ اخبارتازہ ترین - این این آئی۔ 14 مارچ2023ء) قبائلی ضلع اورکزئی کی لوئر تحصیل کے علاقہ ستوری خیل میں نامعلوم مسلح افراد کی موٹرسائیکل سواروں پراندھا دھند فائرنگ کے نتیجے میں دو قبائلی جان سے ہاتھ دھوبیٹھے جبکہ ایک زخمی ہوگیا۔

(جاری ہے)

ریسکیو1122 اور دیگرذرائع کے مطابق فائرنگ کایہ واقعہ منگل کے روز دن دیہاڑے تقریباً گیارہ بجے لوئر اورکزئی کے علاقہ خواہ ستوری خیل میں ترخو سام کے مقام پر مرکزی سڑک پر پیش آیا جہاں مبینہ طورپر سڑک کنارے گھات لگائے مسلح افراد نے موٹرسائیکل سواروں پر اندھا دھند فائئرنگ کردی جس کی زدمیں آکر دو افراد محمدداؤد ساکن فیروز خیل اور قدیر خان ولد ریاض ساکن بیزوٹ فیروز خیل موقع پر جاں بحق ہوگئے جبکہ خان فراز ولد لعل بت سکنہ بیزوٹ نامی شخص شدید زخمی ہوگیا۔

واقعہ کی اطلاع ملنے پر مقامی پولیس اور ریسکیوکی میڈیکل ٹیم اور ایمبولینس کے ہمراہ میڈیکل ٹیم جائے واقعہ پہنچ گئی اور جاں بحق افراد کی لاشوں اور زخمی کو ڈسٹرکٹ ہیڈکوارٹر ہسپتال مشتی میلہ منتقل کردیا۔ بعض غیرمصدقہ اطلاعات کے مطابق ممکنہ طورپر یہ دیرینہ دشمنی کا شاخسانہ بتایاجاتا ہے۔ مقامی پولیس نے دہرے قتل کا مقدمہ درج کرکے واقعہ کی تفتیش شروع کردی ہے۔