کوہاٹ ، دینی مدرسہ مہتمم اورامام مسجد نے 13سالہ طالبہ کوجنسی زیادتی کا نشانہ بنادیا

جمعرات 23 مارچ 2023 20:45

کوہاٹ(اُردو پوائنٹ اخبارتازہ ترین - این این آئی۔ 23 مارچ2023ء) کوہاٹ کے دوراٴْفتادہ دیہی علاقہ میں واقع دینی مدرسہ کے نوجوان مہتمم اور بدبخت امام مسجدنے مبینہ طورپر اپنی ہوس بجھانے کے لئے 13 سالہ طالبہ کو مسجد سے پیوست کمرے میں جنسی زیادتی کا نشانہ بنایا،پولیس نے میڈیکل رپورٹ مثبت آنے پر مبینہ ملزم کو حراست میں لے کرمزید تفتیش شروع کردی ہے۔

پولیس کے مطابق چار روز قبل پولیس سٹیشن گمبٹ کی حدودمیں کوہاٹ کے دوراٴْفتادہ دیہی علاقہ زیرو ڈھوک چورلکی میں واقع آفریدیان نامی ایک دینی مدرسہ کے مہتمم اور امام مسجد قاری عبدالحمید نے اپنی 13 سالہ شاگرد مسماة (م) کودرس کے وقت کسی بہانے سے مسجد سے پیوست کمرے کے اندر لے جاکر زبردستی جنسی زیادتی کا نشانہ بنایا۔ پولیس رپورٹ کے مطابق جنسی بھیڑیا ارتکاب جرم کے بعد متاثرہ لڑکی کو واقعہ پر چپ رہنے کی دھمکی بھی دیتا رہا۔

(جاری ہے)

مقامی پولیس نے متاثرہ لڑکی کی رپورٹ پر سفاک ملزم قاری عبدالحمید کے خلاف فی الفور مقدمہ درج کرکے گرفتار کر لیا ۔پولیس نے زیرحراست ملزم اور متاثرہ لڑکی کا میڈیکل کرانے کے بعد مثبت رپورٹ آنے پر ملزم کو جیل کی سلاخوں کے پیچھے دھکیل دیا ۔پولیس نے عدالت سے جسمانی ریمانڈ حاصل کرنے کے بعدمبینہ ملزم مزید تفتیش کیلئے تفتیشی ٹیم کے حوالے کر دیا ۔ادھر متاثرہ طالبہ کے دادا ثواب گل نے الزام لگایا ہے کہ مبینہ ملزم کئی دیگر بچیوں کے ساتھ بھی جنسی زیادتی کرنے میں ملوث ہے۔