باغبانوں کو آم کی فصل کو بیماریوں سے بچانے کیلئے پودوں کے گھیرے میں پلاسٹک شیٹ بچھانے کا مشورہ

بدھ 29 مارچ 2023 12:26

فیصل آباد (اُردو پوائنٹ اخبارتازہ ترین - اے پی پی۔ 29 مارچ2023ء) محکمہ زراعت نے باغبانوں کو آم کی فصل کو مختلف بیماریوں سے بچانے کیلئے وسط اپریل تک پودوں کے گھیرے میں پلاسٹک شیٹ بچھانے کا مشورہ دیا ہے اور کہاہے کہ اس عمل سے زمین میں موجود کیڑوں کے پروانے باہر نہ نکل سکتے ہیں اس طرح جو سنڈیاں پیوپا بنانے کیلئے پودوں سے نیچے گرتی ہیں وہ بھی مٹی تک نہیں پہنچ پاتیں اور پلاسٹک شیٹ کے اوپر ہی مر جاتی ہیں جس سے آم پر بور کی مکھی کے حملہ کاخدشہ نہیں رہتا۔

انہوں نے کہاکہ پھل بننے اور نئے پتے نکلنے کے مرحلہ پر بور کی مکھی کی سنڈیاں پھل کو نقصان پہنچا سکتی ہیں جس سے پھل کی بڑھوتری رک جاتی ہے۔ انہوں نے کہاکہ اس بیماری سے پتے بھی مختلف جگہوں سے چڑ مڑ ہوجاتے ہیں۔ انہوں نے کہاکہ باغبان اس کیڑے کے مؤثر کنٹرول کیلئے مربوط طریقہ انسداد کی حکمت عملی اپنا کر نقصان سے بچ سکتے ہیں۔

(جاری ہے)

انہوں نے مزید کہا کہ باغبان آم کے باغات اور درختوں پر خصوصی نظر رکھیں اور اگر کسی جگہ پر بٹور والے پھول نظر آئیں تو بلا توقف انہیں سبز حالت میں ہی کاٹ کر تلف کر دیا جائے تاکہ وہ دیگر صحت مند پھولوں کو نقصان نہ پہنچا سکیں۔

انہوں نے کہاکہ باغبان فور ی طور پر آم کے درختوں کو ایک کلوگرام فی پودا یوریا کھاد بھی ڈالیں اور پھل کو صحت مند رکھنے کیلئے آبپاشی بھی جاری رکھیں۔ انہوں نے کہاکہ اگرچہ موجودہ موسمی حالات کے باعث آبپاشی کا وقفہ 20دن تک ہونا چاہیے تاہم باغبان موسم کی کیفیت کے مطابق اس میں کمی بیشی بھی کر سکتے ہیں۔ انہوں نے کہاکہ باغبان 10سے 14 روز کے وقفہ سے سفوفی پھپھوندی کے خلاف پھپھوند کش زہروں کا استعمال کریں تاکہ آم کی فصل کو کوئی نقصان نہ پہنچ سکے۔