موجودہ حکومت ہماری نہیں پی ڈی ایم کی ہے‘کیپٹن (ر) محمد صفدر

تحریکیں چلتی رہتی ہیں، سیاسی جماعتیں ہارتی جیتتی ہیں، شہدا کے لواحقین کے دلوں پر کیا گزری ہوگی ملک جمہوریت کے راستے پر چل پڑا ہے،جھوٹے کیس بنانے کا سلسلہ اب ختم ہونا چاہیے ‘مرکزی رہنما (ن) لیگ

جمعہ 2 جون 2023 15:44

موجودہ حکومت ہماری نہیں پی ڈی ایم کی ہے‘کیپٹن (ر) محمد صفدر

لاہور (اُردو پوائنٹ اخبارتازہ ترین - این این آئی۔ 02 جون2023ء) پاکستان مسلم لیگ (ن) کے مرکزی رہنما کیپٹن (ر) محمد صفدر نے کہا ہے کہ یہ حکومت ہماری نہیں بلکہ پی ڈی ایم کی حکومت ہے، تحریکیں چلتی رہتی ہیں، سیاسی جماعتیں ہارتی جیتتی ہیں، شہدا کے لواحقین کے دلوں پر کیا گزری ہوگی۔لاہور کی ضلع کچہری میں میڈیا سے گفتگو کرتے ہوئے محمد صفدر نے کہا کہ المیہ یہ ہے کہ میں 6 سال سے کیس بھگت رہا ہوں، ہم پورا ایک سال نیب کی عدالت میں پیش ہوتے رہے، جھوٹے کیس بنانے کا سلسلہ اب ختم ہونا چاہیے، میں بغاوت کا مقدمہ بھی بھگت رہا ہوں،غلط کیس بنانے والوں کے خلاف بھی کیس بننا چاہیے۔

انہوں نے کہا کہ مجھ سے ہر دفعہ سوال ہوتا ہے کہ میاں صاحب کب آئیں گے، نواز شریف انصاف پر یقین رکھتے ہیں، شہبازشریف اور اسحاق ڈار ملک کو اس دلدل سے نکال رہے ہیں، آنے والا بجٹ اچھا آئے گا، یہ حکومت ہماری نہیں پی ڈی ایم کی حکومت ہے۔

(جاری ہے)

محمد صفدر کا کہنا تھا کہ جو کام بھارت نہیں کر سکا چیئرمین پی ٹی آئی نے اپنے ایجنٹوں سے کروا دیا، جو ملک کے دفاع کے لئے لڑ رہے ہیں ان کے جذبات پر حملہ ہوا۔تحریکیں چلتی رہتی ہیں، سیاسی جماعتیں ہارتی جیتتی ہیں، شہدا کے لواحقین کے دلوں پر کیا گزری ہوگی۔لیگی رہنما نے مزید کہا کہ پرویز الٰہی کی گرفتاری پر کوئی بات نہیں کروں گا، جو بھی ہو اس ملک کیلئے بہتر ہو، سب سے بڑی خوشی یہ ہے کہ ملک جمہوریت کے راستے پر چل پڑا ہے۔