ٹورنٹو سے پاکستان کیلئے نئی کینیڈین ایئر لائن کا پروازیں شروع کرنے کا اعلان

کراچی (اردو پوائنٹ تازہ ترین اخبار ۔ 3 جون 2023ء ) ٹورنٹو سے پاکستان کیلئے نئی کینیڈین ایئر لائن نے پروازیں شروع کرنے کا اعلان کر دیا۔ نئی کینیڈین ائیر لائن ’زارا ایئرویز‘ کی جانب سے اس سلسلے میں تقریب کراچی کے مقامی ہوٹل میں منعقد کی گئی۔ اس سلسلے میں پریس کانفرنس کرتے ہوئے فقیر باور حسین بخاری کا کہنا تھا کہ ان کا ارادہ ہے کہ بہت جلد زارا ایئرویز کا آپریشن شروع کیا جائے۔

انہوں نے مزید بتایا کہ انہوں نے اپنے ساتھ شاہین ائیرپورٹ سروس کو شامل کیا ہے، شاہین ائیرپورٹ سروس میں ہم ان کی گراؤنڈ سروس کیبن کریو اور دیگر اسٹاف استعمال کریں گے۔ سی ای او ’زارا ائیرویز‘ سید قلی نے تقریب میں بتایا کہ کمپنی کینیڈا سے این او سی کا انتظار کر رہی ہے۔ کوشش ہے اگست میں اپنے آپریشن کا آغاز کریں۔

(جاری ہے)

سید قلی نے بتایا کہ مسافروں کی بڑی تعداد ڈائریکٹ فلائٹس لینا چاہتی ہےجو ہم فراہم کریں گے۔

انہوں نے مزید بتایا کہ ایڈوائزر کی حیثیت سے سابق ایم ڈی پی آئی اے اعجاز ہارون کمپنی کو رہنمائی فراہم کریں گے۔ اعجاز ہارون نے بتایا کہ ڈائریکٹ آپریشن مسافروں کی ترجیح ہے، بزرگ مسافروں کو کنیکٹنگ فلائٹس اور بڑے بڑے ائیرپورٹ پر مسافت سے بچانا ہمارا مقصد ہے۔ سید قلی نے مزید بتایا کہ دو 777 ایل آر طیاروں سے آپریشن شروع کریں گے اور سول ایویشن سے سلاٹس ملنے پر طیاروں کی تعداد بڑھا بھی سکتے ہیں۔ اعجاز ہارون نے مزید کہا کہ لوگ چاہتے ہیں ان کے بزرگ اور فیملی کینیڈا سے چلیں اور ڈائریکٹ پاکستان ان کی منزل ہو۔ ائیر کینیڈا سے بات چیت جاری ہے وہاں کے ایوی ایشن قوانین کے مطابق معاملات حل کررہے ہیں۔