شعیب شیخ جعلی ڈگری اسکینڈل:ملزمان کی اپیلوں پر سماعت 14ستمبرتک ملتوی

جمعرات 6 جولائی 2023 20:31

اسلام آباد (اُردو پوائنٹ اخبارتازہ ترین - آن لائن۔ 06 جولائی2023ء) اسلام آباد ہائیکورٹ کے چیف جسٹس عامرفاروق کی عدالت میں زیر سماعت ایگزیکٹ جعلی ڈگری سکینڈل میں ملزمان کی اپیلوں پردلائل جاری۔عدالت نے کیس کی مزید سماعت14ستمبر تک ملتوی کر دی۔

(جاری ہے)

شعیب احمد شیخ اور رضوان شاہ کی سزا کے خلاف اپیلوں پر سماعت کے دوران شعیب شیخ اپنے وکیل لطیف کھوسہ کے ہمراہ عدالت پیش ہوئے اور کہاکہ ایک ہی وقوعے کے دو الگ مقدمات درج کر دیے گئے،اسلام آباد اور کراچی میں الگ الگ مقدمات درج کئے گئے،سندھ ہائیکورٹ نے کراچی میں درج مقدمہ خارج کر دیا ہے، چیف جسٹس نے استفسار کیاکہ کیا دونوں مقدمات میں الزامات ایک جیسے ہیں ، ایڈیشنل اٹارنی جنرل نے کہاکہ دونوں مقدمات میں مختلف الزامات ہیں، دوسرے مقدمہ کے اندراج کو کسی فورم پر چیلنج نہیں کیا گیا،چیف جسٹس نے ایڈیشنل اٹارنی جنرل سے کہاکہ آپکو عدالتی فیصلوں کے ذریعے اپنا موقف عدالت میں پیش کرنا ہے،لطیف کھوسہ ایڈووکیٹ نے کہاکہ فرق یہ ہے کہ سندھ میں تفتیشی نے تسلیم کیا کہ شواہد موجود نہیں،جج صاحب نے لکھا کہ شور تو بہت مچایا گیا لیکن نکلا کچھ بھی نہیں،شعیب شیخ کے خلاف کوئی ایک بھی شخص شکایت لے کر نہیں آیا، لایک مضمون کی بنیاد پر کراچی اور اسلام آباد میں مقدمات درج کر دیے گئے،دلائل جاری رہے اور عدالت نے کیس کی مزید سماعت 14 ستمبر تک کیلئے ملتوی کر دی۔