برطانوی خاتون شیف بیماری کے باعث 8 سال سے کھانا کھانے سے قاصر

برطانوی شیف منہ کی بجائے نالی کے ذریعے خوراک کو معدے میں ڈالتی ہیں،رپورٹ

جمعہ 21 جولائی 2023 15:35

برطانوی خاتون شیف بیماری کے باعث 8 سال سے کھانا کھانے سے قاصر

لندن(اُردو پوائنٹ اخبارتازہ ترین - این این آئی۔ 21 جولائی2023ء) اپنے بنائے ہوئے پسندیدہ کھانے اور مشروبات کو ہر انسان پسند کرتا ہے لیکن برطانیہ کی ایک خاتون شیف کئی سالوں تک اس چیز سے محروم ہے۔غیرملکی میڈیا کے مطابق 31 سالہ شیف لوریٹا ہارمس میں 2015 میں ایہلرز ڈینلوس سنڈروم (EDS) نامی ایک نایاب سنڈروم کی تشخیص ہوئی جس کے باعث ان کا کھانا ہضم نہیں ہو پاتا تھا۔

اس بیماری کے باعث خاتون نے 8 سال سے منہ سے کوئی بھی کھانا نہیں کھایا اور اس دوران انہیں ایک ٹیوب کے ذریعے کھانا کھلایا جاتا ہے جسے وہ 18 گھنٹے پہنتی تھیں۔ خاتون کا کہنا تھا کہ ڈاکٹرز کئی سال تک میری بیماری کے بارے میں جاننے کی کوشش کرتے رہے جس کے بعد انہیں پتا چلا تو مجھے جواب میں فیڈنگ ٹیوب کا بتایا گیا۔

(جاری ہے)

خاتون کا کہنا تھا کہ مجھے بتایا گیا کہ فیڈنگ ٹیوب کے ذریعے غذا ایک تھیلے سے براہ راست میرے سینے میں سوراخ کے ذریعے معدے کی نالی میں جائے بغیر میرے خون میں جاسکتی ہے جس کا مطلب یہ ہوگا کہ میں دوبارہ کبھی کھانا اور منہ سے نہیں لے سکوں گی۔

برطانوی خاتون نے اپنی بیماری اور حالت کو اپنے شوق کے سامنے کھڑا نہ ہونے دیا۔ وہ اپنے سونگھنے کے احساس کو استعمال کرتے ہوئے کھانے بنا کر اپنے خاندان اور دوستوں کو کھلاتی ہیں۔شیف لوریٹا ہارمس سوشل میڈیا پر کھانے کی دلچسپ اور مزیدار طریقے بھی شیئر کرتی ہیں۔