پشاور،خیبر ٹیچنگ ہسپتال میں مریضوں کو لوٹنے والے گینگ کا مرکزی ملزم گرفتار، 14 موبائل فون برآمد

منگل 26 ستمبر 2023 17:58

پشاور (اُردو پوائنٹ اخبارتازہ ترین - اے پی پی۔ 26 ستمبر2023ء) پشاور کی تھانہ ٹائون پولیس نے خیبر ٹیچنگ ہسپتال میں تیمارداروں و مریضوں کو لوٹنے والے گینگ کا سراغ لگا کر مرکزی ملزم کو گرفتار کرلیا۔ پولیس ترجمان کے مطابق ملزم کے قبضے سے موبائل فونز برآمد کرلئے گئے ۔ حکام کا کہنا ہے کہ برآمد شدہ موبائل فونز کے اصل مالکان کاپتہ لگایا جارہا ہے جن کو اپنے موبائل فونز حوالے کئے جائیں گے۔

(جاری ہے)

مدعی محمد رفیق ولد گل احمد نے تھانہ ٹائون پولیس کو خیبر ٹیچنگ ہسپتال میں موبائل چوری کی رپورٹ کی تھی ۔پولیس نے سی سی ٹی وی کیمروں کی فوٹیج کے ذریعے ملزم بلال کو گرفتار کرلیا جو ضلع چارسدہ مندنی کا رہائشی ہے۔ ملزم نے ابتدائی تفتیش کے دوران ہسپتالوں میں مریضوں اور تیمارداروں سے موبائل فونز چوری کرنے کے بعد اونے پونے داموں فروخت کرنے کا انکشاف کیا ،اس کے قبضے سے 14 موبائل فونز برآمد کرکے تفتیش شروع کردی گئی ہے۔