ڈیرہ غازی خان پولیس نے کچہری میں قتل کی نیت سے آنے والے ملزمان کو گرفتار کر کے اسلحہ برآمد کرلیا

منگل 26 ستمبر 2023 19:40

ڈیرہ غازی خان (اُردو پوائنٹ اخبارتازہ ترین - اے پی پی۔ 26 ستمبر2023ء) ڈیرہ غازی خان پولیس نے کچہری میں قتل کی نیت سے آنے والے ملزمان کو گرفتار کر کے ہینڈ گرنیڈ کلاشنکوف، پسٹل اور گولیاں برآمد کر کے تفتیش شروع کر دی ہے۔تفصیلات کے مطابق ایس ایچ او تھانہ سول لائن طالب حسین نے واردات کی نیت سے آئے ہوئے تین ملزمان کو اسلحہ سمیت گرفتار کر لیا۔ ایس ایچ او نے بتایا کہ پیشی پر آنے والے اسحاق عرف شاکا ککھ کو حبیب اللہ نے اپنے دیگر نامعلوم ساتھیوں کے ہمراہ مل کر قتل کر دیا تھا اور فرار ہو گئے، جس پر تھانہ سول لائن میں مقدمہ نمبر 295/23 درج ہوا۔

مقدمہ کی پیروی کو روکنے کے لئے حبیب اللہ نے اپنے دیگر ساتھیوں سے ملکر شاکا ککھ کے بھائی جو عدالت پیشی پر آئے ہوئے تھے کو نقصان پہنچانے کے لئے اسلحہ سمیت پہنچ گئے پولیس نے اطلاع ملتے ہی بروقت کاروائی کر کے ملزمان قاسم، محمد اختر اور یونس کو ہینڈ گرنیڈ، کلاشنکوف، پسٹل اور گولیوں سمیت گرفتار کر لیا جبکہ اس کے دیگر ساتھی فرار ہوگئے۔

(جاری ہے)

ایس ایچ او نے مزید بتایا کہ ابتدائی تفتیش کے دوران ملزمان نے بتایا کہ وہ بلال وغیرہ جو مقدمہ کی پیروی کر رہے تھے کو مقدمہ کی پیروی سے روکنے کے لئے بھاری نقصان پہنچانے کی نیت سے آئے تھے لیکن گرفتار کر لیے گئے۔ایس ایچ او نے مزید کہا کہ ڈی پی او ڈیرہ غازی خان سید حسنین حیدر کی ہدایت پر شرپسندی اور خوف و حراس پھیلانے والوں سے آہنی ہاتھوں نمٹا جائے گا اورکسی کو امن خراب کرنے کی اجازت نہیں دیں گے۔