]اخبار فروشوں کی اسلام آباد مارچ کرنے کی دھمکی

کسی بھی حکومت نے اخبار فروشوں کی فلاح و بہبود کے لئے کبھی کوئی قدم نہیں اٹھایا، رضا خان، محمد رفیق، رحمن گل مہمند

جمعہ 20 اکتوبر 2023 06:30

ٓپشاور(اُردو پوائنٹ اخبارتازہ ترین - آن لائن۔ 20 اکتوبر2023ء) اخبار فروش یونین ضلع پشاور کے صدر رضا خان، جنرل سیکرٹری محمد رفیق اور سیکرٹری اطلاعات رحمن گل مہمند نے کہا ہے کہ ہوشربا مہنگائی کی وجہ سے اخبار فروشوں کی زندگی اجیرن بن گئی ہے، ایک طرف اخبار کی قیمت میں اضافہ ہوا ہے دوسری طرف پی ڈی ایف کی وجہ سے اخبار کی فروخت میں انتہائی کمی آئی ہے، اخبار فروش فیڈریشن کے سیکرٹری جنرل ٹکا خان نے پشاور کے اخبار فروشوں سے شناختی کارڈ کی کاپیاں لی تھیں ایک سال گزرنے کے باوجود کسی بھی اخبار فروش کے ساتھ مالی تعاون نہیں کیا گیا،نگران حکومت موجودہ مشکل حالات کو دیکھتے ہوئے اخبار فروشوں کے لئے ریلیف کا اعلان کرے تاکہ ان کی مشکلات میں کمی آسکے۔

ان خیالات کا اظہار انہوں نے اپنے دفتر میں ہنگامی اجلاس سے اپنے خطاب میں کیا۔

(جاری ہے)

انہوں نے کہا کہ جس سیاسی جماعت کی بھی حکومت آئی ہے اس نے اخبار فروشوں کو سہانے خواب دکھائے ہیں لیکن عملی طور پر کسی بھی حکومت نے اخبار فروشوں کی فلاح و بہبود کے لئے کوئی قدم نہیں اٹھایا ہے،انہوں نے موجودہ نگران حکومت کو خبردار کیا کہ اگر اخبارفروشوں کی فلاح و بہبود کے لئے نگران حکومت نے اقدامات نہ اٹھائے تو ملک بھر کے اخبار فروش اسلام آباد کی طرف مارچ کرنے پر مجبور ہوجائیں گے، جس کی تمام تر ذمہ داری موجودہ نگران حکومت پر عائد ہوگی۔۔