محکمہ زراعت کی مختلف کارروائیاں،10لاکھ روپے مالیت کی جعلی ڈی اے پی برآمد

ملتان (اُردو پوائنٹ اخبارتازہ ترین - اے پی پی۔ 20 نومبر2023ء) محکمہ زراعت نے مختلف کارروائیاں کرتے ہوئے 10لاکھ روپے مالیت کی جعلی ڈی اے پی برآمدکر لی۔ترجمان کے مطابق محکمہ زراعت توسیع کی ملتان کے مختلف علاقوں میں جعلی کھاد فیکٹریوں پر چھاپے مارکر 10لاکھ روپے مالیت کی جعلی کھادیں برآمد کرکے بطورمال مقدمہ حوالہ پولیس کردی۔اسسٹنٹ فرٹیلائزر کنٹرولر ملتان نے مظفرگڑھ روڈ پرشیرشاہ درباراوربہاولپورروڈ پرچنگی نمبر14 میں جعلی کھاد فیکٹریوں پر چھاپہ مار کر10لاکھ روپے مالیت کی جعلی ڈی اے پی کھاد ومیٹریل برآمد کرلیا اور موقع سے سینکڑوں پرنٹڈ، خالی بیگز ودیگر میٹریل بھی قبضہ میں لے لیا۔

گاڑی پر50بوری کھاد لوڈ تھی جوکہ فروخت کیلئے مارکیٹ بھیجی جارہی تھی۔ ملزمان محمد اصغر ولد محمد نواز کرناول کیخلاف تھانہ مظفر میں اندراج مقدمہ کیلئے  اشتغاثہ جمع کرادیاہے، اسی طرح بہاولپور روڈ پر چنگی نمبر14 میں جعلی کھاد فیکٹری پر چھاپہ ماراکیا گیا اور موقع پر 20بوری سونا ڈی اے پی کھاد رکشہ پر لوڈ تھی جسے قبضہ میں لیکر حوالہ پولیس کردیا اور ملزمان محمد آصف کرناول اورنعیم مظفر کیخلاف تھانہ ممتاز آباد میں اندراج مقدمہ کیلئے استغاثہ دائر کیا۔

(جاری ہے)

ملزمان بغیر لائسنس و ریکارڈ کے جعلی کھاد بنارہے تھے۔ ملزمان جعلی کھاد غیر قانونی طریقے سے تیار وپیک کرکے ملک کے مختلف حصوں میں سپلائی کرکے معیشت کو ناقابل تلافی نقصان پہنچا رہے تھے۔ موقع پر کھاد کے نمونہ جات حاصل کرکے تجزیہ کیلئے لیبارٹری بھجوا دئیے گئے ہیں۔ ترجمان محکمہ زراعت پنجاب نے کہا ہے کہ جعلی زرعی مداخل فروخت کرنے والے مافیا کے خلاف آہنی ہاتھوں سے نمٹا جارہا ہے اور اس گھناؤنے کاروبار میں ملوث افراد کو قرار واقعی سزا دی جارہی ہے۔ حکومت پنجاب جعلی زرعی مداخل کا کاروبار کرنے والوں کے خلاف زیرو ٹالرلینس پالیسی کے اصول پرعمل پیراہے اوراس کاروبار کی بیخ کنی کیلئے تمام ممکنہ کارروائیاں عمل میں لائی جارہی ہیں۔