Live Updates

خام تیل کی قیمتیں 4 ماہ کی کم ترین سطح پر آ گئیں

عالمی مارکیٹ میں برطانوی خام تیل کی فی بیرل قیمت 3 ڈالرز سے زائد کمی سے 80 ڈالرز کی سطح سے نیچے آ گئی

محمد علی پیر 20 نومبر 2023 19:14

نیویارک (اُردو پوائنٹ اخبارتازہ ترین۔ 20 نومبر2023ء) خام تیل کی قیمتیں 4 ماہ کی کم ترین سطح پر آ گئیں، عالمی مارکیٹ میں برطانوی خام تیل کی فی بیرل قیمت 3 ڈالرز سے زائد کمی سے 80 ڈالرز کی سطح سے نیچے آ گئی۔ تفصیلات کے مطابق عالمی مارکیٹ میں خام تیل کی قیمتوں میں نمایاں کمی کا رجحان دیکھا جا رہا ہے۔ عالمی مارکیٹ میں خام تیل کی قیمتیں 4 ماہ کی کم ترین سطح پر آنے کے بعد برطانوی خام تیل کی قیمت 3 ڈالر 79 سینٹس کمی کے بعد 77 ڈالر 52 سینٹس فی بیرل پر آ گئی۔

جبکہ امریکی خام تیل کی قیمت 3 ڈالر 71 سینٹس کمی سے 72 ڈالر 95 سینٹس فی بیرل پر آ گئی ہے۔ واضح رہے کہ چند ماہ قبل سعودی عرب کی جانب سے تیل کی پیداوار میں نمایاں کٹوتی کا اعلان کیا گیا تھا، جس کے بعد تیل کی قیمتیں 90 ڈالرز تک بھی پہنچ گئی تھیں۔

(جاری ہے)

تاہم گزشتہ چند روز کے دوران تیل کی قیمتوں میں نمایاں کمی دیکھنے میں آئی ہے، تاہم ماہرین کی رائے میں تیل کی قیمتوں میں کمی کا رجحان برقرار رہنا یقینی نہیں ہے۔

ادھر عالمی بینک نے کہا ہے کہ توقع ہے کہ چوتھی سہ ماہی میں تیل کی عالمی قیمتیں اوسطاً 90 ڈالر فی بیرل رہیں گی اور 2024 میں اوسطاً 81 ڈالر تک گر جائیں گی۔ ورلڈ بینک نے خبردار کیا کہ مشرق وسطیٰ کے تنازع میں اضافے سے قیمتوں میں نمایاں اضافہ ہو سکتا ہے، جس کے نتیجے میں مہنگائی میں بھی اضافہ ناگزیر ہوجائے گا۔ غیر ملکی خبر رساں ادارے کی رپورٹ کے مطابق ورلڈ بینک کا کہنا ہے کہ تیل کی عالمی قیمتوں میں اضافے کے سبب پوری دنیا میں اشیائے خورد و نوش کی قیمتوں میں بھی اضافہ ہوگا۔

عالمی بینک کے کموڈیٹی مارکیٹس آؤٹ لک رپورٹ میں کہا گیا ہے کہ اگر لڑائی مزید نہیں پھیلتی تو پھر تیل کی قیمتوں پر اس کے اثرات محدود نوعیت کے ہوں گے لیکن اگر تصادم بڑھتا ہے اور لڑائی مزید پھیل جاتی ہے تو پھر تیزی سے صورتِ حال خراب سے خراب ہوتی جائے گی۔