عمران خان کی انسداد دہشتگردی عدالت میں ویڈیو لنک پر پیشی کے ایس او پیز جاری

راولپنڈی ( اُردو پوائنٹ اخبارتازہ ترین۔ 18 ستمبر 2025ء ) پاکستان تحریک انصاف کے پیٹرن انچیف عمران خان کی انسداد دہشتگردی عدالت میں ویڈیو لنک پر پیشی کے ایس او پیز جاری کردیئے گئے۔ میڈیا رپورٹس کے مطابق انسداد دہشت گردی عدالت راولپنڈی کی جانب سے سابق وزیراعظم عمران خان کی ویڈیو لنک حاضری سے متعلق نئے ایس او پیز جاری کیے گئے ہیں، اس ضمن میں عدالت نے حکم دیا ہے کہ ویڈیو لنک کی کارروائی میں کوئی بھی شخص ریکارڈنگ نہیں کر سکے گا اور عدالت کے اندر موبائل فون یا دیگر ریکارڈنگ ڈیوائسز لے جانے پر پابندی عائد کی گئی ہے۔

عدالتی حکم نامہ میں یہ بھی کہا گیا ہے کہ ویڈیو لنک کے ذریعے ہونے والی کارروائی کی ریکارڈنگ صرف عدالت کی جانب سے کی جا سکے گی اور اگر کسی نے اس ریکارڈنگ کی کوشش کی تو اس کے خلاف فوجداری قوانین کے تحت کارروائی کی جائے گی، اس کے علاوہ کوئی شخص خواہ وکیل ہی کیوں نہ ہو اس کو بھی ویڈیو لنک کی کارروائی کا ریکارڈ یا ٹرانسکرپٹ فراہم نہیں کیا جائے گا۔

(جاری ہے)

بتایا جارہا ہے کہ پنجاب حکومت نے سابق وزیراعظم عمران خان کے خلاف جی ایچ کیو حملے کیس کے جیل ٹرائل کا نوٹیفکیشن واپس لے لیا، جی ایچ کیو حملہ کیس اور نو مئی مقدمات کا ٹرائل اب اڈیالہ جیل کی بجائے انسداد دہشت گردی عدالت راولپنڈی میں ہی ہوگا، اس حوالے سے پنجاب حکومت کی جانب سے ایک نیا نوٹیفکیشن بھی جاری کردیا گیا، جس کے تحت کیس کی سماعت کے دوران ضرورت پڑنے پر عمران خان کو ویڈیو لنک پر پیش کیا جائے گا، جی ایچ کیو حملہ کیس اور دیگر مقدمات کے دیگر ملزمان اے ٹی سی راولپنڈی میں پیش ہوں گے۔

میڈیا سے گفتگو کرتے ہوئے عمران خان کے وکیل فیصل ملک نے کہا کہ 9 مئی کے 12 مقدمات کی سماعت تھی، جی ایچ کیو حملہ کیس سمیت دیگر مقدمات کی سماعت یکم اکتوبر تک ملتوی ہوگئی، جی ایچ کیو حملہ کیس میں عدالت نے بتایا ایک نوٹیفکیشن آرہا ہے، ہمیں بتایا گیا جی ایچ کیو حملہ کیس جیل سے دوبارہ اے ٹی سی راولپنڈی میں آرہا ہے جہاں عمران خان کو ویڈیو لنک کے ذریعے عدالت میں پیش کیا جائے گا، ہم عدالت میں درخواست دے رہے ہیں کہ بانی پی ٹی آئی کو عدالت میں پیش کیا جائے، ہم پنجاب حکومت کے ایسے نوٹیفکیشن کو مسترد کرتے ہیں۔