وفاقی اردو یونیورسٹی کے تمام سٹیک ہولڈرز اور سینیٹ اراکین یونیورسٹی کی نمایاں پوزیشن بحال کرنے کیلئے معاملات بہتر بنانے کیلئے کام کریں، صدر

اسلام آباد (اُردو پوائنٹ اخبارتازہ ترین - این این آئی۔ 20 نومبر2023ء) صدر مملکت ڈاکٹر عارف علوی نے وفاقی اردو یونیورسٹی برائے آرٹس، سائنسز اینڈ ٹیکنالوجی کے تمام سٹیک ہولڈرز اور سینیٹ اراکین پر زور دیا ہے کہ وہ جامعہ کی نمایاں پوزیشن بحال کرنے کے لیے اس کے معاملات کو بہتر بنانے کے لیے کام کریں۔ ان خیالات کا اظہار انہوں نے پیر کو ایوان صدر میں وفاقی اردو یونیورسٹی کی سینیٹ کے 49 ویں خصوصی اجلاس کی صدارت کرتے ہوئے کیا۔

ایوان صدر کے پریس ونگ کے مطابق اجلاس میں وفاقی وزارت تعلیم و پیشہ ورانہ تربیت کے سیکرٹری، ایگزیکٹیو ڈائریکٹر ہائیر ایجوکیشن کمیشن اور دیگر سینیٹ ممبران نے شرکت کی۔ صدر مملکت نے اس بات پر افسوس کا اظہار کیا کہ یونیورسٹی کے سینیٹ اجلاس باقاعدگی سے نہیں ہو پا رہے ہیں۔

(جاری ہے)

انہوں نے یونیورسٹی کے تمام سٹیک ہولڈرز اور سینیٹ اراکین پر زور دیا کہ وہ یونیورسٹی کی نمایاں پوزیشن بحال کرنے کیلئے معاملات بہتر بنانے کیلئے کام کریں۔

صدر مملکت نے بروقت فیصلے کرنے کیلئے اہم عہدوں پر تعیناتیوں کی ضرورت پر زور دیا۔ یونیورسٹی کی سینیٹ نے پروفیسر ڈاکٹر روبینہ مشتاق کی بطور قائم مقام وائس چا نسلر وفاقی اردو یونیورسٹی تقرری کی منظوری دی۔ اس موقع پر وفاقی اردو یونیورسٹی کے باقاعدہ وائس چانسلر کی تقرری کیلئے سرچ کمیٹی کی تشکیل پر بھی غور کیا گیا۔اجلاس میں وائس چانسلر کی تقرری کا عمل 60 دنوں میں مکمل کرنے پر اتفاق کیا گیا۔

وفاقی اردو یونیورسٹی کی سینیٹ نے وفاقی اردو یونیورسٹی آرڈیننس کی شقوں کے پیش نظر انجمن ترقی اردو پاکستان کے صدر کی بطور سینیٹ رکن خدمات جاری رکھنے پر بھی اتفاق کیا گیا۔ مزید برآں اجلاس میں ایچ ای سی کی فیکٹ فائنڈنگ رپورٹ میں بے ضابطگیوں کے الزامات کی تحقیقات کیلئے انکوائری کمیٹی بنانے اور کمیٹی کی سفارشات سینیٹ کو پیش کرنے پر بھی اتفاق کیا گیا۔