دنیا کا پہلا 'اڑنی' والا الیکٹرک بحری جہاز، آزمائشی مراحل مکمل

جمعہ 24 نومبر 2023 22:18

سٹاک ہولمز (اُردو پوائنٹ اخبارتازہ ترین - آن لائن۔ 24 نومبر2023ء) دنیا کے پہلے اڑنے والے بحری جہاز نے آزمائشی مراحل کو مکمل کرلیا ہے اور آئندہ سال اسے متعارف کرائے جانے کا امکان ہے۔ غیر ملکی خبر رساں ادارے کے مطابق یہ الیکٹرک فلائنگ پسنجر شپ سویڈن کی ایک کمپنی کینڈلا ٹیکنالوجی اے بی نے تیار کیا ہے۔اسے کینڈلا پی 12 کا نام دیا گیا ہے جو 12 میٹر لمبا ہے۔

اس میں ایک وقت میں 30 مسافر سفر کر سکتے ہیں۔ کمپنی کے مطابق کینڈیلا پی 12 پانی میں 29 میل فی گھنٹہ کی رفتار سے پروازکرسکتا ہے۔کمپنی نے مزید بتایا کہ یہ سواری پانیوں میں سفر کے انداز کو بدل کر رکھ دے گی۔یہ جہاز پرواز کے لیے ہائیڈرو فوائلز کو استعمال کرتا ہے جس سے پانی میں موجود اس کا نچلا حصہ پانی کی سطح سے اوپر اٹھ جاتا ہے۔

(جاری ہے)

ہائیڈرو فوائلز سے پانی کی رگڑ کم ہوتی ہے اور یہ جہاز روایتی کشتیوں کے مقابلے میں زیادہ رفتار سے سفر کر پاتا ہے۔

کمپنی کے مطابق اس میں 2 انجن استعمال کیے گئے ہیں جن کو 252 کلو واٹ کی بیٹری پاور فراہم کرتی ہے جبکہ اس کا ڈیجیٹل فلائٹ کنٹرول سسٹم لہروں، ہوا اور پانی میں موجود برقی رو کو مدنظر رکھ کر ہائیڈرو فوائلز کو ایڈجسٹ کرتا ہے۔کمپنی کی جانب سے اس کی قیمت نہیں بتائی گئی مگر اس کا کہنا تھا کہ 2024 سے یہ الیکٹرک سواری سویڈن کے 2 شہروں کے درمیان چلائی جائے گی، جس سے 55 منٹ کا سفر 25 منٹ میں طے ہوسکے گا۔