اٹھارویں آئینی ترمیم کے خاتمے سے ملک کا نقصان ہو گا ،ایمل ولی

اب وقت ہے تمام پختون عوامی نیشنل پارٹی کے پرچم تلے متحد ہو جائیں ، اپنے وسائل پر اختیار کیلئے ہمارے دست و بازو بن جائیں ،صوبائی صدرعوامی نیشنل پارٹی

جمعہ 24 نومبر 2023 22:34

سوات(اُردو پوائنٹ اخبارتازہ ترین - این این آئی۔ 24 نومبر2023ء) عوامی نیشنل پارٹی کے صوبائی صدرا یمل ولی خان نے کہا ہے کہ اٹھارویں آئینی ترمیم کے خاتمے سے ملک کا نقصان ہو گا ، بعض مفاد پرست سیاستدانوں کی وجہ سے پختونوں کا استحصال ہو رہا ہے، افغان وار کو جہاد کا نام دینے والے پختون قوم سے معافی مانگے اب لوگوں کے سمجھ میں آ گیا ہے کہ وہ جہاد نہیں فساد تھا ۔

ان خیالات کا اظہار انہوں نے پی کے 6کے اٴْمیدوار عاصم خان کی رہائش گاہ پر پی کے 6 کے ورکرز کنونشن سے خطاب کرتے ہوئے کیا اس موقع پر اے این پی کے ڈپٹی جنرل سیکرٹری و امیدوار این اے 4 ڈاکٹر محمد سلیم خان، جائنٹ سیکرٹری خان نواب، سیکرٹری اقلیتی امور امرجیت ملہوترا، صوبائی ایڈیشنل جنرل سیکرٹری و اٴْمیدوار پی کے 9 رحمت علی خان، سوشل میڈیا کوارڈینیٹر سیف اللہ فضل، ضلعی صدر و امیدوار این اے 2 ایوب خان اشاڑے، ضلعی جنرل سیکرٹری خواجہ محمد خان، امیدوار پی کے 3 سید جعفر شاہ، امیدوار پی کے 7 شیر شاہ خان، امیدوار پی کے 8 افتخار خان، امیدوار پی کے 10 ظاہر شاہ خان رور جان اور دیگر ذمہ داران بھی موجود تھے جبکہ اس سے قبل ایوب خان، عاصم خان اور خواجہ خان نے بھی خطاب کیا جبکہ کنونشن کے موقع پر سیف اللہ باچا کے خاندان (زمین زادہ باچا، اسفندیار بابو، فضل مولا باچا) اور دیگر اراکین کی عوامی نیشنل پارٹی میں شمولیت اختیار کی۔

(جاری ہے)

صوبائی صدر ایمل ولی خان نے پارٹی ٹوپیاں پہنا کر خوش آمدید کہا ۔کنونشن سے خطاب کے دوران ایمل ولی خان نے کہا کہ پختون قوم کے جاگنے کا وقت آ گیا ہے جس دن پختونوں نے فیصلہ کیا تو ان مفاد پرست سیاستدانوں کو چھپنے کی جگہ نہیں ملے گی،اب بھی وقت ہے تمام پختون عوامی نیشنل پارٹی کے پرچم تلے متحد ہو جائیں اور اپنے وسائل پر اپنے اختیار کیلئے ہمارے دست و بازو بن جائیں تاکہ ہم یہاں کے وسائل پختونوں پر لگا سکے۔