اسد قیصر کی ایک مقدمے میں ضمانت کے بعد دوسرے میں گرفتاری ،حکومت سے جواب طلب

یہ کیا مذاق ہے، ضمانت کے بعد دوسرے مقدمے میں گرفتار کرلیا جاتا ہے، قانون کیا کہتا ہے ،دیکھیں گے، پشاور ہائی کورٹ

منگل 28 نومبر 2023 20:45

اسد قیصر کی ایک مقدمے میں ضمانت کے بعد دوسرے میں گرفتاری ،حکومت سے جواب ..

پشاور (اُردو پوائنٹ اخبارتازہ ترین - این این آئی۔ 28 نومبر2023ء) پشاورہائیکورٹ نے سابق سپیکر اسد قیصر کی باربار گرفتاری پر حکومت سے جواب طلب کرتے ہوئے ریمارکس دیئے کہ یہ کیا مذاق ہے، ضمانت ملنے کے بعد دوسرے مقدمے میں گرفتار کرتے ہیں، قانون اس پر کیا کہتا ہے یہ دیکھیں گے۔تفصیلات کے مطابق پشاور ہائی کورٹ میں جسٹس اشتیاق ابراہیم اور جسٹس صاحبزادہ اسد ال نے پی ٹی آئی رہنماء و سابق سپیکر قومی اسمبلی اسد قیصرکیخلاف موجودہ مقدمات میں گرفتار نہ کرنے کی درخواست پر سماعت کی ۔

درخواست گزار اسد قیصر کے وکیل نے عدالت میں موقف اختیار کیا کہ ضمانت ملتے ہی دوسرے مقدمے میں گرفتارکر لیا جاتا ہے، پہلے سے درج مقدمات میں گرفتار نہ کیا جائے۔سرکاری وکیل نے موقف اپنایا کہ اسد قیصر مقدمات میں نامزد ہیں اس لئے گرفتار ہوتے ہیں۔

(جاری ہے)

اسد قیصر کے وکیل نے عدالت سے استدعا کی کہ اسد قیصر کی درخواست ضمانت پر (آج) سماعت ہوگی، ضمانت ملنے کے بعد دوسرے مقدمے میں گرفتاری روک دی جائے۔

جسٹس اشتیاق ابراہیم نے ریمارکس دیئے کہ یہ کیا مذاق ہے، ضمانت ملنے کے بعد دوسرے مقدمے میں گرفتار کرتے ہیں، قانون اس پر کیا کہتا ہے یہ دیکھیں گے۔جسٹس اشتیاق ابراہیم نے اسد قیصر کے وکیل سے کہا کہ آپ تیاری کرلیں ،حکومت جواب جمع کرائے، کیس کو آئندہ سماعت پر سنیں گے۔عدالت نے حکومت سے جواب طلب کرکے سماعت 7دسمبر تک ملتوی کردی۔