Live Updates

زلمی فاؤنڈیشن کا فضائی محافظین کو خراجِ تحسین ، 5 کروڑ روپے کا اعلان

اتوار 11 مئی 2025 19:10

اسلام آباد (اُردو پوائنٹ اخبارتازہ ترین - اے پی پی۔ 11 مئی2025ء) پشاور زلمی اور زلمی فاؤنڈیشن کے چیئرمین جاوید آفریدی نے انتہائی فخر اور غیر متزلزل حب الوطنی کے جذبے کے ساتھ پاکستان کے بہادر فضائی محافظین کو خراجِ تحسین پیش کرنے کے لیے 5 کروڑ روپے کا اعلان کیا ہے۔اتوار کو جاری پریس ریلیز کے مطابق یہ خراجِ تحسین حالیہ واقعات کے تناظر میں پیش کیا گیا ہے،ایک ایسی صورتحال میں جہاں بڑے پیمانے پر نقصان اور جانی ضیاع کا خطرہ تھا، پاکستان کے فضائی محافظین نے برق رفتاری، درستگی اور جرأت مندی سے کارروائی کرتے ہوئے کسی بھی نقصان یا جانی ضیاع کو رونما نہیں ہونے دیا۔

جاوید آفریدی نے کہا کہ ان کی بے مثال جرأت، لگن اور قربانی ہماری قومی شان کا دل ہے۔ آج ہم انہیں صرف الفاظ سے نہیں بلکہ عملی اقدامات کے ذریعے خراجِ تحسین پیش کر رہے ہیں،یہ محض ایک علامتی اقدام نہیں بلکہ قومی یکجہتی اور ان ہیروز کے لیے گہرے احترام کی مضبوط علامت ہے جو بے خوفی سے ہمارے آسمانوں کی حفاظت کرتے ہیں۔

(جاری ہے)

یہ زلمی فاؤنڈیشن کے اس عزم کی عکاسی کرتا ہے کہ وہ ان لوگوں کے ساتھ کھڑی ہے جو ملک و قوم کی خدمت کو اپنا فخر سمجھتے ہیں،نوجوانوں کو بااختیار بنانے اور قومی ترقی کے لیے اپنی وابستگی کے لیے جانی جانے والی زلمی فاؤنڈیشن جذبے کے ساتھ قیادت کرتی رہے گی ۔ جرأت کو سلام، اتحاد کو مضبوطی اور ان کو خراجِ عقیدت جو فرض کو سب کچھ پر مقدم رکھتے ہیں۔