پائلٹس کے جہاز اڑانے سے انکار پر بھارت ڈرونز بھیجنے پر مجبور ہوا‘ احسن اقبال

نارووال(اُردو پوائنٹ اخبارتازہ ترین - این این آئی۔ 11 مئی2025ء)وفاقی وزیر منصوبہ بندی ، ترقی و خصوصی اقدامات احسن اقبال نے کہا ہے کہ پاکستان نے ثابت کیا جنگیں تعدادسے نہیں جیتی جاتیں،پاکستان نے رافیل طیارے گراکر بھارت کا غرور خاک میں ملایا، پاکستان نے ثابت کیا کہ شاہینوں کا مقابلہ دنیا میں کوئی نہیں کرسکتا، ایل اوسی پر ہماری افواج نے بھارتی چوکیوں کو نشانہ بناکر بھاگنے پر مجبور کردیا۔

اپنے آبائی حلقے نارروال میں یوم تشکر کے موقع پر نکالی گئی ریلی سے خطاب کرتے ہوئے احسن اقبال نے کہا کہ بھارتی پائلٹس نے جہاز اڑانے سے انکار کردیا اورڈرونز بھیجنے پر مجبور ہوئے، پاکستانی افواج نی70سے زائد بھارتی ڈرونز گرائے، بھارت نے رات کی تاریکی میں پاکستان پر3میزائل چھوڑے، پاکستان نے جوابی کارروائی میں دن کے اجالے میں بھارت کے ہوائی اڈوں،فوجی تنصیبات کو نشانہ بنایا۔

(جاری ہے)

بھارت کی چیخیں واشنگٹن پہنچیں،بھارت امریکہ سے کہتا رہا آئو اورہماری جان چھڑائو، ہماری مسلح افواج نے بھارت کو ناکوں چنے چبوائے،پاک فضائیہ نے دشمن کواپنی صلاحیت سے شکست فاش کیا۔احسن اقبال نے کہا کہ پاکستان نے ثابت کردیا کہ جنگیں تعدادسے نہیں جیتی جاتیں، آج پوری دنیا پاکستان کی حکمت عملی اورصلاحیت کی تعریف کررہی ہے، بانی پی ٹی آئی نے بھی اسمبلی میں کھڑے ہوکرکہا تھا کیا کروں بھارت پر حملہ کردوں۔

عمران خان کو جنگ لڑنے کی حکمت عملی کا علم نہیں تھا، آج وزیراعظم شہبازشریف نے مسلح افواج کو پورا جواب دیا، سی این این نے بتایا کہ بھارت نے جان بخشی کرانے کیلئے امریکہ کی منتیں کیں، امریکہ کی مداخلت پر سیز فائر ہوا، پاکستان نے اپنے ذمہ دار ملک ہونے کا ثبوت دیا ہے۔انہوں نے کہا کہ پاکستان نے پہلے دن ہی کہا تھا پہلگام واقعہ سے کوئی لینا دینا نہیں، بھارت نے ڈرامہ رچاکرکوشش کی تھی کہ پاکستان پر غلبہ پاسکے، بھارت نے پاکستان کی بات چیت کی پیشکش ٹھکرا کر فیصلہ میدان جنگ میں کرنے کی کوشش کی، ہم نے بھارت کو میدان جنگ میں دن کو تارے دکھائے اورواپس میز پر لائے۔

احسن اقبال نے کہا کہ بھارتی میڈیا ایک تھیٹر بنا ہوا تھا، بھارتی میڈیا نے فلموں اور ڈراموں سے زیادہ جھوٹ بولا، حقیقت پتہ چلنے پر بھارت کے پلے خود کچھ نہیں رہا تھا،آج مسئلے جنگ وجدل سے نہیں بات چیت سے ہی حل ہوسکتے ہیں۔