نوجوان سرکاری افسر بلال پاشا کی مبینہ خود کشی کی وجہ سامنے آ گئی

بنوں (اردوپوائنٹ اخبارتازہ ترین ۔ 28 نومبر 2023ء) نوجوان سرکاری افسر بلال پاشا کی مبینہ خود کشی کی وجہ سامنے آ گئی، پولیس نے بنوں کنٹونمنٹ بورڈ میں تعینات رہنے والے چیف ایگزیکٹیو افسر محمد بلال پاشا کی خودکشی کے حوالے سے نیا انکشاف کر دیا۔ تفصیلات کے مطابق بنوں میں نوجوان سرکاری افسر بلال پاشا کی مبینہ خود کشی کے حوالے سے کی جانے والی تحقیقات میں اہم پیش رفت ہوئی ہے۔

واقعے کی تفتیش کرنے والی بنوں پولیس کی جانب سے بتایا گیا ہے کہ بلال پاشا کی موت کی حقیقت جاننے کیلئے تحقیقات جاری ہیں، جائے وقوعہ کا معائنہ کیا گیا اور ہر پہلوسے جائزہ لیا گیا جس کے بعد اس نتیجے پر پہنچے ہیں کہ واقعہ بظاہر خود کشی ہے۔ پولیس کے مطابق بلال پاشا کا گھریلو تنازعہ بھی چل رہا تھا، نوجوان سرکاری افسر کا بنوں سے راولپنڈی تبالہ بھی ہوگیا تھا۔

(جاری ہے)

پولیس نے انکشاف کیا ہے کہ راولپنڈی بلال پاشا کی سابقہ اہلیہ بھی بڑے سرکاری عہدے پر فائز ہے، اسی وجہ سے وہ پریشانی کا شکار تھے۔ پولیس حقائق جاننے کیلئے مزید تفیش کر رہی ہے اور تاحال یہی ثابت ہورہا ہے کہ یہ خود کشی کا واقعہ تھا۔ ابتدائی تحقیقات کے مطابق بلال پاشا نے 9ایم ایم پستول سے اپنی کنپٹی پر ایک گولی چلائی جس سے ان کی موت واقع ہوئی، پوسٹ مارٹم پورٹ بھی یہی ظاہر کررہی ہے۔

پولیس نے انکوائری کرکے رپورٹ تھانہ کینٹ میں درج کر دی ہے۔ دوسری جانب مبینہ خود کشی کرنے والے نوجوان سرکاری افسر بلال پاشا کے والد نے بھی اردو پوائنٹ سے خصوصی گفتگو میں کئی اہم انکشافات کر دیے۔ بلال پاشا کے بزرگ والد نے بتایا کہ بیٹے کا بنوں سے تبادلہ ہو گیا تھا، ایک دن بعد راوپنڈی کیلئے روانہ ہونا تھا۔

گزشتہ ہفتے بات ہوئی تو بیٹے نے کہا ابو راولپنڈی تبادلہ ہوا وہاں جا کر آپ کیلئے نئی گاڑی لوں گا، چھٹی لے کر گھر آوں گا اگر چھٹی نہ ملی تو آپ کو ساتھ لے جاوں گا۔ اتوار کے دن فجر کے وقت بیٹے کی کال آئی لیکن نماز کی وجہ سے بات نہ ہو سکی، اس کے بعد کئی کالز کیں لیکن بیٹے نے فون نہیں اٹھایا، اس دن رات کو کال کی تو فون ہی بند تھا۔ پھر بیٹے کے قریبی دوست کو کال کی اسے بتایا کہ بلال کال نہیں اٹھا رہا تو پھر وہ بیٹے کی رہائش گاہ گیا، وہاں کمرے کا دروازہ کھٹکھٹاتا رہا، دروازہ نہ کھلنے پر دروازہ توڑ کر اندر داخل ہوا تو بیٹا کی لاش سامنے پڑی تھی۔

بلال پاشا کے والد نے مزید بتایا کہ ان کے بیٹے کو کوئی پریشانی نہیں تھی۔ بیٹے نے کبھی کسی سے اپنی کسی پریشانی کا ذکر نہیں کیا۔ بیٹے کے پریشان ہونے سے متعلق جتنی باتیں سامنے آ رہی ہیں وہ غلط ہیں، بیٹا کو تو خود مجھے کال کر تسلیاں دیتا تھا۔ بیٹے پر نوکری کے حوالے سے بھی کوئی دباو نہیں تھا، بیٹے نے پشاور اور بنوں میں جہاں بھی کام کیا وہاں سب لوگ بیٹے سے خوش تھے۔ بلال پاشا کے والد نے مزید بتایا کہ ان کے بیٹے کی شادی ہوئی تھی تاہم میاں بیوی کی علیحدگی ہو گئی تھی، دونوں کی کئی اولاد نہیں تھی۔