پشاور میں پولیس موبائل کے قریب دھماکہ، سب انسپکٹر سمیت 2 اہلکار شہید

ابتدائی طور پرخود کش لگ رہا ہے، جس میں ممکنہ طور پر پولیس موبائل ٹارگٹ تھی؛ ایس ایس پی آپریشنز مسعود بنگش

ساجد علی اتوار 11 مئی 2025 22:16

پشاور میں پولیس موبائل کے قریب دھماکہ، سب انسپکٹر سمیت 2 اہلکار شہید

پشاور ( اُردو پوائنٹ اخبارتازہ ترین۔ 11 مئی 2025ء ) صوبہ خیبرپختونخواہ کے دارالحکومت پشاور میں پولیس موبائل کے قریب دھماکہ ہوا جس کے نتیجے میں سب انسپکٹر سمیت 2 اہلکار شہید ہوگئے۔ تفصیلات کے مطابق پشاور میں پولیس موبائل کے قریب دھماکہ ہوا ہے جس کے نتیجے میں سب انسپکٹر سمیت 2 پولیس اہلکار شہید اور 2 زخمی ہوئے، ایس ایس پی آپریشنز مسعود بنگش نے بتایا کہ پشاور کے علاقے چمکنی مویشی منڈی میں پولیس موبائل کے قریب دھماکہ ہوا۔

ایس ایس پی آپریشنز کا کہنا ہے کہ دھماکے میں 2 پولیس اہلکار شہید اور 2 زخمی ہوگئے، شہید ہونے والوں میں سب انسپکٹر لائق زادہ اور سپاہی شامل ہے، ابتدائی طور پرخود کش لگ رہا ہے، جس میں ممکنہ طور پر پولیس موبائل ٹارگٹ تھی، دھماکے کی نوعیت معلوم کی جارہی ہے، جس کے لیے موقع سے شوائد اکھٹے کیے جارہے ہیں۔

(جاری ہے)

وفاقی وزیر داخلہ محسن نقوی نے پشاور کے علاقے میں پولیس موبائل کے قریب دھماکے کی مذمت کرتے ہوئے دھماکے میں شہید ہونے والے 2 پولیس اہلکاروں کو خراج عقیدت پیش کیا، اپنے بیان میں وفاقی وزیرداخلہ نے شہید اہلکاروں کے لواحقین سے دلی ہمدردی اور تعزیت کا اظہار بھی کیا، محسن نقوی نے کہا کہ پولیس اہلکاروں نے فرائض کی ادائیگی کے دوران شہادت کا اعلی مرتبہ پایا، شہید اہلکاروں کے خاندانوں کے غم میں برابر کے شریک ہیں۔