ٹی ٹوئنٹی پریکٹس میچ میں پاکستان ویمنزٹیم کو 28 رنزسے شکست کا سامنا

پہلے پریکٹس ون ڈے میچ میں پاکستان ویمنز نے 57 رنز سے کامیابی حاصل کی تھی

جمعرات 30 نومبر 2023 19:55

ٹی ٹوئنٹی پریکٹس میچ میں پاکستان ویمنزٹیم کو 28 رنزسے شکست کا سامنا

کرائسٹ چرچ (اُردو پوائنٹ اخبارتازہ ترین - آن لائن۔ 30 نومبر2023ء) نیوزی لینڈ الیون ویمنز نے پاکستان ویمنز کرکٹ ٹیم کو ٹی ٹوئنٹی پریکٹس میچ میں28 رنز سے شکست دیدی۔یہ اس دورے میں پاکستان ویمنز ٹیم کا دوسرا پریکٹس میچ تھا ۔منگل کو کھیلے گئے پہلے پریکٹس ون ڈے میچ میں پاکستان ویمنز نے 57 رنز سے کامیابی حاصل کی تھی۔برٹ سٹکلف اوول لنکن میں جمعرات کے روز کھیلے گئے ٹی ٹوئنٹی میچ میں پاکستان ویمنز نے ٹاس جیت کر میزبان ٹیم کو بیٹنگ دی جس نے 20 اوورز میں 7 وکٹوں کے نقصان پر 168رنز اسکور کیے۔

جی ای پلیمر نے 35 گیندوں پر52 رنز بنائے جس میں چار چوکے اور ایک چھکا شامل تھا۔او این گین نے 28 رنز کی اننگز کھیلی۔ندا ڈار ،نشرہ سندھو اور وحیدہ اختر نے دو دو وکٹیں حاصل کیں۔جواب میں پاکستان ویمنز ٹیم 20 اوورز میں 8 وکٹوں کے نقصان پر140 رنز بنا پائی۔

(جاری ہے)

منیبہ صدیقی نے چار چوکوں کی مدد سی32رنز بنائے۔نجیہہ علوی 19 رنز بناکر ناٹ آئوٹ رہیں۔ این ایچ پٹیل اور کے اے نائٹ نیدو دو وکٹیں حاصل کیں۔

اس موقع پر دونوں ٹیموں نے سپر اوور بھی کھیلا پہلے سپر اوور میں دونوں ٹیموں نے دس دس رنز اسکور کیے جس کے بعد دوسرا سپر اوور کھیلا گیا نیوزی لینڈ الیون ویمنز نے پہلے بیٹنگ کرتے ہوئے 9 رنز بنائے ۔ پاکستان ویمنز ٹیم بھی 9 رنز بنا پائی اور یہ سپر اوور بھی برابر ہوگیا۔پاکستان اور نیوزی لینڈ ویمنز کرکٹ ٹیموں کے درمیان تین ٹی ٹوئنٹی انٹرنیشنل سیریز کا آغاز تین دسمبر سے ہوگا۔سیریز میں تین ون ڈے انٹرنیشنل میچز بھی شامل ہیں۔ ون ڈے سیریز آئی سی سی ویمنز چیمپئن شپ کا حصہ ہے۔