نیشنل ٹی ٹوئنٹی سپر 8مرحلہ،راولپنڈی، ایبٹ آباد اور پشاور کی کامیابیاں

کراچی (اُردو پوائنٹ اخبارتازہ ترین - اے پی پی۔ 03 دسمبر2023ء) نیشنل ٹی ٹوئنٹی کپ سپر8مرحلے کے تیسرے روز راولپنڈی، ایبٹ آباد اور پشاور نے کامیابیاں حاصل کر لیں۔یوبی ایل سپورٹس کمپلیکس میں راولپنڈی نے سیالکوٹ کو 3وکٹوں سے شکست دیدی،سیالکوٹ نے پہلے بیٹنگ کرتے ہوئے 2وکٹوں کے نقصان پر 163رنز بنائے،شعیب ملک نے 56گیندوں پر 84رنزکی اننگز کھیلی اور ناٹ آئوٹ رہے،عاشر محمود نے72رنز بنائے اور وہ بھی آئوٹ نہیں ہوئے ،شعیب ملک اور عاشر محمود نے تیسری وکٹ کی ناقابل شکست شراکت میں 153رنز کا اضافہ کیا،جواب میں راولپنڈی نےمطلوبہ ہدف 18.4اوورز میں7 وکٹوں کے نقصان پر پورا کیا، یاسرخان نے جارحانہ بیٹنگ کرتے ہوئے 7 چھکوں اور 4چوکوں کی مدد سے صرف52گیندوں پر87رنز ناٹ آئوٹ میچ وننگ اننگز کھیلی۔

(جاری ہے)

وہ اس شاندار پرفارمنس پر پلیئر آف دی میچ قرار پائے۔این بی پی اسپورٹس کمپلیکس میں ایبٹ آباد نے فاٹا کو 57رنز سے ہرادیا۔ایبٹ آباد نے پہلے بیٹنگ کرتے ہوئے 5وکٹوں پر188رنز سکور کئے،فخرزمان نے اپنے مخصوص جارحانہ انداز میں کھیلتے ہوئے69رنز بنائے جس میں 5چوکے اور3چھکے شامل تھے۔ سجاد علی نے 4چوکوں اور 2چھکوں کی مدد سے44رنز بنائے، ان دونوں نے پہلی وکٹ کی شراکت میں123رنز کا اضافہ کیا۔

آصف علی نے 25 اور خوشدل شاہ نے39رنز کے عوض دو دو وکٹیں حاصل کیں۔فاٹا کی ٹیم 17.2اوورز میں 131 رنز بناکر آئوٹ ہوگئی۔سمیع اللہ جونیئر 8چوکوں کی مدد سے53رنز بناکر ٹاپ اسکورر رہے۔ شہاب خان نے عمدہ بائولنگ کرتے ہوئے 20رنز دے کر5وکٹیں حاصل کیں۔خالد عثمان نے 29رنز کے عوض 3کھلاڑی آئوٹ کئے،شہاب اپنی عمدہ بائولنگ کے سبب پلیئر آف دی میچ قرار پائے۔

نیشنل بینک اسٹیڈیم میں پشاور نے لاہور بلیوز کو5رنز سے ہرادیا۔پشاور کی ٹیم پہلے بیٹنگ کرتے ہوئے 20اوورزمیں 133رنز بناکر آئوٹ ہوگئی۔محمد حارث نے 5چوکوں اور5 چھکوں کی مدد سے55رنز اسکور کیے۔ عثمان قادر نے صرف 14رنز دے کر 5وکٹیں حاصل کیں۔حنین شاہ نے دو کھلاڑیوں کو 29رنز دے کر آئوٹ کیا۔جواب میں لاہور بلیوز کی ٹیم مقررہ اوورز میں8 وکٹوں پر128رنز بنا سکی، کاشف بھٹی 25رنز بناکر ٹاپ سکورر رہے۔ افتخار احمد اور عمران خان نے بالترتیب 16اور33رنز دے کر دو دو وکٹیں حاصل کیں۔محمد حارث پلیئر آف دی میچ قرار پائے۔