صوبہ بھر کے گرجا گھروں میں مسیحی عباداتی پروگرامز کے فول پروف انتظامات یقینی بنائے گئے

گرجا گھروں، مسیحی آبادیوں اورحساس مقامات کے گرد سرچ اینڈ سویپ آپریشنز جاری رکھے جائیں‘ آئی جی پنجاب

اتوار 3 دسمبر 2023 20:40

لاہور(اُردو پوائنٹ اخبارتازہ ترین - این این آئی۔ 03 دسمبر2023ء) انسپکٹر جنرل پولیس پنجاب ڈاکٹر عثمان انور کی ہدایت پر صوبہ بھر میں شہریوں کی جان و مال کے تحفظ کیلئے سکیورٹی کے بہترین انتظامات یقینی بنائے جا رہے ہیں جس کے تسلسل میں پولیس ٹیموں نے اتوار کے روز لاہور سمیت صوبہ بھر کے گرجا گھروں میں مسیحی عباداتی دعائیہ پروگرامز کیلئے فول پروف انتظامات یقینی بنائے گئے۔

صوبے کے تمام اضلاع میں پولیس ٹیموں نے ہائی الرٹ ہو کر سکیورٹی فرائض ادا کئے۔

(جاری ہے)

آئی جی پنجاب ڈاکٹر عثمان انور نے آر پی اوز، ڈی پی اوز کو گرجا گھروں کی سکیورٹی بڑھانے کا حکم دیتے ہوئے کہا کہ تمام اضلاع میں ایس پیز اور سپروائزری افسران گرجا گھروں، اہم مقامات کے سکیورٹی انتظامات خود چیک کریں، آئی جی پنجاب نے ہدایت کی کہ حساس گرجا گھروں پر پولیس کی اضافی نفری اور سنائپرز تعینات کئے جائیں، ڈولفن سکواڈ، پی آر یو، ایلیٹ ٹیمیں گرجا گھروں کے گرد موثر پٹرولنگ کریں، آئی جی پنجاب نے مزید کہا کہ سکیورٹی ڈیوٹی پر تعینات پولیس افسران اور جوان انتہائی الرٹ رہیں، شر پسند عناصر پر کڑی نظر رکھیں، ڈاکٹر عثمان انور نے مزید کہا کہ گرجا گھروں، مسیحی آبادیوں اورحساس مقامات کے گرد سرچ اینڈ سویپ آپریشنز جاری رکھے جائیں، علما کرام، مسیحی کمیونٹی، امن کمیٹیوں کے ارکان بین المذاہب ہم آہنگی کو فروغ دیں، ڈاکٹر عثمان انور نے کہا کہ پنجاب پولیس نے مسیحی کمیونٹی سمیت اقلیتوں کے مسائل ترجیحی بنیادوں پر حل کرنے کے لئے میثاق سنٹرز قائم کئے ہیں جو مسیحی شہریوں کو بھرپور ریلیف فراہم کر رہے ہیں۔