بیرون ملک حماس رہنمائوں کو ختم کردیں گے، سربراہ شاباک کی دھمکی

دھمکیاں ان مشکلات کی عکاسی کر رہی ہیں جس کا اسرائیل سامنا کر رہا ہے،حماس کا ردعمل

پیر 4 دسمبر 2023 14:06

تل ابیب(اُردو پوائنٹ اخبارتازہ ترین - این این آئی۔ 04 دسمبر2023ء) اسرائیل کی داخلی سلامتی سروس(شاباک)کے سربراہ رونن بار نے حماس کے رہنمائوں کو بیرون ملک قتل کرنے کی دھمکی دے دی ہے۔ غیرملکی خبررساں ادارے کے مطابق اسرائیلی پبلک براڈکاسٹنگ کارپوریشن کی طرف سے نشر کی گئی ایک ریکارڈنگ میں انہوں نے کہا کہ اسرائیل قطر، ترکی اور لبنان میں حماس کا پیچھا کرے گا۔

اس مقصد کے لیے اسے چاہے برسوں بھی لگ جائیں۔رونن بار نے مزید کہا کہ کابینہ نے ہمارے لیے ایک ہدف مقرر کیا ہے۔ یہ ہدف حماس کو ختم کرنا ہے۔ ہم اپنے ہدف کو حاصل کرنے کے لیے غزہ میں ، مغربی کنارے میں، لبنان میں، ترکیہ میں اور قطر میں کہیں بھی جا سکتے ہیں۔ چاہے اس میں چند سال بھی لگ جائیں لیکن ہم اس پر عمل درآمد کے لیے پرعزم ہیں۔

(جاری ہے)

انہوں نے کہا حالیہ حملہ ہمارا میونخ ہے۔

سربراہ شاباک کے اس بیان پر حماس کے سیاسی بیورو کے سربراہ کے میڈیا ایڈوائزر طاہر النونو نے کہا کہ حماس کے رہنمائوں کو اندرون اور بیرون ملک نشانہ بنانے کی اسرائیلی دھمکیاں تحریک کے کسی بھی رہنما کو خوفزدہ نہیں کرتیں۔ یہ دھمکیاں ان مشکلات کی عکاسی کر رہی ہیں جس کا اسرائیل سامنا کر رہا ہے۔ یہ دھمکیاں دشمن کے رہنماں کی طرف سے بیان کردہ برادر ملکوں کی خودمختاری کی صریح خلاف ورزی ہیں۔