سندھ ہائیکورٹ کا کراچی کی نجی ہاوسنگ سوسائٹی کی زمین سے قبضہ ختم کروانے کا حکم

بدھ 6 دسمبر 2023 23:07

کراچی(اُردو پوائنٹ اخبارتازہ ترین - آن لائن۔ 06 دسمبر2023ء) سندھ ہائی کورٹ نے کراچی کی اسکیم 33 میں نجی ہاوسنگ سوسائٹی کی زمین سے 21 دسمبر تک غیر قانونی گوٹھ مکینوں کا قبضہ ختم کروانے کا حکم دے دیا۔سندھ ہائی کورٹ کے جسٹس ندیم اختر نے کراچی کی اسکییم 33 میں نجی ہاسنگ سوسائٹی کی زمین پر قبضے کے خلاف سماعت کی۔عدالت نے گوٹھ مکینوں کی آپریشن روکنے کی استدعا مسترد کرتے ہوئے سوسائٹی کی زمین سے 21 دسمبر تک قبضہ ختم کروانے کا حکم دے دیا۔

عدالت نے قابضین کے وکیل سے استفسار کیا کہ آپ کس حیثیت میں عدالتی احکامات پر عملدرآمد رکوانا چاہتے ہیں اپنی زمین کے حصول میں ایک نسل گزر گئی، دوسری گزرنے والی ہے کیا تیسری نسل کا انتظار کر رہے ہیں وکیل نے کہا یہ زمین غریب آباد گوٹھ کی ہے، اس پر عدالت نے استفسار کیا کہ کیا شہری علاقہ میں گوٹھ آباد کی منظوری ادارہ ترقیات کراچی نے دی۔

(جاری ہے)

وکیل نے کہا گوٹھ میں ایک ہزار افراد رہائش پزیر ہیں، وہاں پر مدرسہ، مسجد اور اسکول قائم ہیں۔جسٹس ندیم اختر نے کہا کہ قابضین چاہے ایک ہزار ہوں یا ایک لاکھ، زمین ان کی ملکیت تو نہیں، گوٹھ کی ملکیت کی سند فراہم کریں، کیا گوٹھوں کی سندیں بغیر تاریخ کے جاری کی جاتی ہیں، اس سند پر تاریخ تک درج نہیں۔عدالت نے کہا کہ سندھ حکومت غریب آباد گوٹھ منسوخ کرکے نوٹی فکیشن بھی جاری کرچکی ہے۔

وکیل سوسائٹی نے کہا کہ 2009 میں بورڈ آف ریونیو نے اس سند کو جعلی اور بوگس قرار دیا تھا، سندھ ہای کورٹ نے قبضہ مافیا کی پٹیشن خارج کرتے ہوئے ملوث افسران کے خلاف کارروائی کا حکم دیا تھا۔عدالت قابضین کے وکیل سے استفسار کیا کہ سندوں سے متعلق دار کردہ سول مقدمات میں تین سالوں سے پیروی کیوں نہیں کررہے، آپ کی یہ درخواست کیسے قابل سماعت ہوسکتی ہے، آپ جایں سول کیس سارا دن چلایں آپ یہاں اعتراض نہیں کرسکتے۔