پشاور، غیر رجسٹرڈ گاڑیوں‘ کالے شیشوں اور فینسی نمبر پلیٹ کے استعمال پر 918 افراد پر جرمانے عائد

قانون ہر خاص و عام پر لاگو ہوتا ہے جس سے کوئی مبرا نہیں ہے‘ شہری ٹریفک عملے کے ساتھ تعاون کریں‘ چیف ٹریفک آفیسر ڈاکٹر زاہد اللہ

اتوار 10 دسمبر 2023 19:10

) پشاور(آن لائن)سٹی ٹریفک پولیس پشاور کی جانب سے غیر رجسٹرڈ موٹر سائیکلوں‘ کالے شیشوں اور فینسی نمبر پلیٹ لگانے والوں کیخلاف کارروائیاں جاری ہیں جس کے تحت 918 افراد پر جرمانے عائد کئے گئے۔ آئی جی خیبر پختونخواہ اختر حیات خان کی ہدایت پر سٹی ٹریفک پولیس پشاور نے شہر کے مختلف سیکٹروں میں ناکہ بندیاں کی ہیں جہاں پر غیر رجسٹرڈ گاڈیاں چلانے‘ کالے شیشے اور فینسی نمبر پلیٹ استعمال کرنیوالوں کے خلاف کارروائیاں جاری ہیں جس کے تحت کالے شیشے استعمال کرنے پر 690، غیر رجسٹرڈ گاڑیاں چلانے پر 120 اور فینسی نمبر پلیٹ کے استعمال پر 98 افراد کیخلاف کارروائی عمل میں لائی گئی اور گاڑیوں سے کالے شیشے اور فینسی نمبر پلیٹ اتارے اور خلاف ورزی کرنیوالوں پر جرمانے عائد کئے۔

چیف ٹریفک آفیسر ڈاکٹر زاہد اللہ نے کہا ہے کہ ٹریفک عملہ قوانین پر عملدرآمد یقینی بنانے کے لئے تمام تر صلاحیتیں بروئے کار لائے گی جبکہ خلاف ورزی کرنیوالوں کے خلاف سخت قانونی کارروائی عمل میں لائے گی۔

(جاری ہے)

انہوں نے مزید کہا کہ معمول کے مطابق کالے شیشوں کے استعمال‘ غیر رجسٹرڈ گاڑیاں چلانے اور فینسی نمبر پلیٹ کے استعمال پر پابندی عائد ہے جس کے خلاف سٹی ٹریفک پولیس پشاور الرٹ ہے اور کسی کے ساتھ نرمی نہیں برتی جائیگی کیونکہ قانون ہر خاص و عام کیلئے یکساں ہے جس سے کوئی مبرا نہیں ہے۔ انہوں نے مزید کہا کہ شہری ٹریفک عملے کے ساتھ تعاون کریں اور ٹریفک قوانین کی پاسداری کرتے ہوئے محب وطن پاکستانی ہونے کا ثبوت دیں۔ن