اے این ایف کی کارروائیاں، 1416 کلو منشیات برآمد، 12 ملزمان گرفتار

ملزمان کیخلاف انسدادِ منشیات ایکٹ کے تحت مقدمات درج ،تحقیقات کا آغاز کر دیا گیا

پیر 11 دسمبر 2023 11:50

اے این ایف کی کارروائیاں، 1416 کلو منشیات برآمد، 12 ملزمان گرفتار

لاہور (اُردو پوائنٹ اخبارتازہ ترین - این این آئی۔ 11 دسمبر2023ء) اینٹی نارکوٹکس فورس (اے این ایف) نے منشیات کی اسمگلنگ کے خلاف 12 مختلف کارروائیوں کے دوران 1416 کلو منشیات برآمد کر کے 12 ملزمان کو گرفتار کر لیا۔ترجمان اے این ایف کے مطابق اسلام آباد میں بس میں سوار 3 ملزمان سے 500 گرام چرس اور 3 کلو افیون برآمد کی گئی۔آر سی ڈی روڈ پر کوئٹہ سے کراچی کی بس میں 3ملزمان سے 18کلو چرس برآمد کی گئی۔

رنگ روڈ پشاور سے گاڑی اور رکشہ سے مجموعی طور پر 2ملزمان سے 48کلو چرس برآمد کی گئی۔روات میں گھر سے 3کلو ہیروئن، 1کلو 370گرام آئس اور 7کلو 200 گرام چرس برآمد ہوئی ہے۔پشین میں یارو چوک کے قریب سے گاڑی سے 950 کلو چرس برآمد کر ملزم کو گرفتار کیا گیا ہے۔اے این ایف کے ترجمان کا کہنا ہے کہ جامشورو ٹول پلازہ سکھر کے قریب گاڑی سے 55 کلو چرس برآمد کر کے 2 ملزمان کو گرفتار کیا گیا ہے۔

(جاری ہے)

کراچی میں شیرشاہ کے قریب سے ملزم سے 54 کلو چرس برآمد کی ہے۔خیبر کے غیر آباد علاقے میں 2مختلف کارروائیوں میں 105 کلو 500 گرام چرس برآمد ہوئی ہے۔میٹھا خان میں کوہاٹ کے قریب سے اسمگلنگ کے لیے چھپائی گئی 10 کلو 800 گرام چرس برآمد کی گئی ہے۔قلعہ عبداللہ کے غیر آباد علاقے سے جھاڑیوں میں چھپائی گئی 160 کلو ہیروئن برآمد ہوئی ہے۔اے این ایف کے ترجمان نے بتایا ہے کہ تمام گرفتار ملزمان کے خلاف انسدادِ منشیات ایکٹ کے تحت مقدمات درج کر کے تحقیقات کا آغاز کر دیا گیا ہے۔