پاکستانی ایوارڈ یافتہ فلم ان فلیمز آسکر میں جگہ بنانے میں ناکام ہوگئی

ہفتہ 23 دسمبر 2023 15:23

ممبئی (اُردو پوائنٹ اخبارتازہ ترین - این این آئی۔ 23 دسمبر2023ء) عالمی ایوارڈ یافتہ پاکستانی فلم ان فلیمز آسکر ایوارڈ کی دوڑ سے باہر ہوگئی۔فلمی دنیا کے سب سے معتبر ایوارڈ آسکر نے آئندہ سال مارچ میں ہونے والے 96ویں سالانہ ایوارڈز کے لیے 10 کیٹیگریز میں شارٹ لسٹ کی گئی فلموں کے ناموں کا اعلان کر دیا۔پاکستانی جیوری نے ان فلیمز کو آسکر ایوارڈز کے لیے رواں سال اکتوبر میں فیچر کیٹیگری کے لیے شارٹ لسٹ کیا تھا تاہم اکیڈمی ایوارڈ کی جانب سے جاری کردہ شارٹ لسٹ میں پاکستانی فلم جگہ بنانے میں ناکام ہوگئی۔

ضرار خان کی ہدایت کاری میں بننے والی پاکستانی کینیڈین ہارر فلم کا مقابلہ دنیا کی 150 سے زائد فلموں سے تھا تاہم اب عالمی فیچر فلم کے ایوارڈ کے لیے 10 ممالک کی فلموں کے درمیان مقابلہ ہوگا۔

(جاری ہے)

ضرار خان کے قلم سے پیش کردہ اس فلم کی کہانی مریم اور اس کی والدہ کے گرد گھومتی ہے، مریم میڈیکل کی طالبہ ہے اور اپنی والدہ فرح اور چھوٹے بھائی کے ساتھ کراچی کے ایک چھوٹے سے فلیٹ میں رہتی ہیں جبکہ اس کے والد قرضوں کے بوجھ تلے وفات پا چکے ہوتے ہیں۔

ایسے میں اس کے چچا قرض داروں کو ان کا قرض لوٹانے کی پیشکش کرتے ہیں اور آہستہ آہستہ مریم اور اس کے اہلِ خانہ کو ان کے گھر سے بے دخل کرنے کی کوشش کرتے ہیں۔فلم میں کوئی بھی گلیمر یا گانا موجود نہیں، اس کی کہانی انتہائی سادہ مگر آرٹ سے بھرپور ہے جو دیکھنے والوں کو اپنے ساتھ جڑے رہنے پر مجبور کرتی ہے۔اان فلیمز کی کاسٹ میں بختاور مظہر، رمیشا ناول، عدنان شاہ ٹیپو اور عمیر جاوید سمیت دیگر شامل ہیں۔

واضح رہے کہ آسکر کی دوڑ سے نکلنے والی پاکستانی فلم ’ان فلیمز‘ متعدد عالمی ایوارڈز اپنے نام کر چکی ہے جس میں رواں ماہ کے آغاز میں سعودی عرب کے شہر جدہ میں منعقد ہونے والے ریڈ سی انٹرنیشنل فلم فیسٹیول میں بہترین فیچر فلم کیلئے گولڈن یسر ایوارڈ بھی شامل ہے جبکہ اس فلم کو متعدد فلمی میلوں میں بھی دکھایا جا چکا ہے۔