عام انتخابات ،کوئی بھی خواجہ سرا الیکشن جیت کر پارلیمنٹ نہ پہنچ سکا

ہفتہ 10 فروری 2024 22:41

لاہور (اُردو پوائنٹ اخبارتازہ ترین - آن لائن۔ 10 فروری2024ء) ملک بھر میں قومی و صوبائی نشستوں پر کوئی بھی خواجہ سراجیت کر پارلیمنٹ نہ پہنچ سکا۔حالیہ الیکشن میں ملکی تاریخ میں پہلی بار 13خواجہ سرا بھی انتخابی دنگل میں شامل تھے،ان خواجہ سرائوں میں سے دو قومی جبکہ 11صوبائی اسمبلیوں کی نشستوں پر قسمت آزما تھے۔انتخابی معرکے میں حصہ لینے والے خواجہ سرا امیدواروں میں فرزانہ ریاض این اے 33، آرزو خان پی کے 33، لبنی پی پی 26، کومل پی پی 38، میڈم بھٹو پی پی 189، نایاب این اے 142، جب کہ ندیم کشش قومی اسمبلی اور عاشی، بلال خان بے بو پنجاب اسمبلی کی نشست کے لیے انتخاب لڑ رہے تھے۔

وفاقی دارالحکومت سے تعلق رکھنے والے اعلی تعلیم یافتہ خواجہ سرا نایاب نے این اے 142 میں بھر پور انتخابی مہم چلائی لیکن ووٹرز کی حمایت نہ حاصل کر سکیں۔

(جاری ہے)

پشاور کے حلقہ این ای33 میں فرزانہ ریاض نے بھی اپنی کمیونٹی کی آواز پارلیمان میں پہنچانے کیلئے انتخابی دنگل کے دوران بھر پور ڈور ٹو ڈور مہم چلائی لیکن وہ بھی نشست نہ جیت سکیں۔اسی طرح آرزو خان پی کے 33، لبنی پی پی 26، کومل پی پی 38، میڈم بھٹو پی پی 189، عاشی ، بلال خان بے بھی صوبائی اسمبلی کی نشست پر کامیاب نہ ہو سکے۔

انتخانی نتائج کے بعد خواجہ سرائوں کا کہنا تھا کہ ہم نے بھی جمہوری نظام اور انتخابی عمل میں اپنا بھر پور حصہ ملایا ہے اور ثابت کیا ہے کہ خواجہ سرا بھی انسان اور اس معاشرے کے اہم رکن ہیں۔انہوں نے مزید کہا خواہش ہے کہ پارلیمان میں ہماری بھی نمائندگی ہو، ہم ان تمام ووٹرز کا شکریہ ادا کرتے ہیں جنہوں نے ہمیں ووٹ دیا اور ان کا بھی جنہوں نے ووٹ نہیں دیا، ہم اپنی جمہوری جدوجہد مستقبل میں بھی جاری رکھیں گے۔